Радийовий концерт Оркєстры св. Миколая

Днес до студия Польского Радия в Ряшові приіхат добрі знана вшыткым любителям фольковой і не лем музыкы – Оркєстра св. Миколая з Люблина.

Од 19.00 год. на антені ряшівского радия буде трансмітуваний концерт Оркєстры, котрий окрем традицийного радийового переказу (радийовы частоты поданы сут за тым мотузком), буде тіж доступний в інтернеті (до слуханя через переглядач – за тым мотузком, або через зовнішній плеєр – влучаючы тот файль).

На концерті гудакы ансамблю запрезентуют материял, котрий найде ся на заплянуваній на тот рік платни. Як чытаме в фейсбуковій заповіди концерту, то новий підхід до корінной музыкы, котрий задоволит так любителів традицийного выконаня, як і тых, котры любуют ся в барже модерных формах.

Оркєстра св. Миколая то прекурсоры фольковой музыкы в Польщы, котры од основаня ансамблю в 1988 р. часто сігают по русиньскы народны пісні. Од все інспірує іх Лемковина. На своім сайті тепло пишут: Жаден з реґіонів Польщы не може быти гордым з так великой кількости та спонтанічні выражаной популярности свого музычного фольклору, як Лемковина. То ачий маґія і істория тых гір, але лемківскым пісням не мож одмовити чысто музычных, естетычных прикмет.

Ансамбль, діючий при Університеті Мариі Курі-Склодовской, выдал уж парунадцет альбомів (в тым пару реедиций), та нашол ся на парох збірных платнях. Русиньска (в тым і лемківска) музыка переважат на добрі знаных і популярных в радию лем.фм выданях: Muzyka gór (1992 і реедиция 2007), Kraina Bojnów (1998 і реедиция 2012), Huculskie Muzyki (2006 – найліпша фолькова платня за  2006 р. в конкурсі Віртуальны Гушлі, ІІІ місце в конкурсі Польского Радия на Фольковий Фоноґрам Рока 2006), Lem-Agination (2007).