Радийо ЛЕМ.фм нагороджене!

«В тым, што роблят, были першыма, а віст о іх основаню розышла ся по цілым світі. Од початку фунґуваня зъєднали собі серця слухачів. Нагороду Проліт 2019 – за цінны ініциятивы в промоциі лемківской культуры, якы реалізуют через діяльніст радия і порталю – отримує радийо ЛЕМ.фм». Такыма словами в минулу пятницю, 19. лютого/фебруара 2019 рока, вчас торжественной ґалі вручыня нагорід Мосты Старосты в Дворі Карвациянів в Ґорлицях, пані Мария Ґубала, Староста Ґорлицкій, передала статую Проліт Мостa Старосты на рукы Даміана Трохановского, ведучого Руской Бурсы в Ґорлицях, де од 2011 рока фунґує радийо і порталь лем.фм.

Капітула нагороды номінувала 6 осіб і інституций до тогорічной едициі. Были то Марек Бердиховскій – музикант і весільный староста, член фольклорного ансамблю Бескіды, Анна Бухман, пропаґаторка польской культуры за границьом, котра веде Польскій Музей в Рапперсвіль в Швейцариі, молодый і талантливый музик і композитор – Оскар Ценкєр, братя Ігор і Вєслав Червєнь, якы реконструуют історичне оружа і войскове облечыня та Юзеф Ґуцва, якого – посеред другых – великом пасийом сут забытковы мотоциклі, котры колекцийонує і реконструує. Наконец, і мы – радийо лем.фм, нашли ся посеред номінуваных.

Староста Ґорлицкій, Мария Ґубала, вчас выголошыня нагороды Проліт 2019:

Староста Мария Ґубала іщы перед розданьом обох статуй доцінила вклад творців в розвиток ґорлицкой землі, звертаючы ся до вшыткых словами «То вы робите прекрасны і неоцінены діла, одкрывате перед нами незнане, утверджаючы нас в думаню, же ґорлицкій повіт то накрасше місце на земли».

Бесідуючы дальше, Мария Ґубала зложыла подякуваня за активніст номінуваных і творче фунґуваня в соспільным і культурным жытю ґорлицкой землі.

По презентациях номінуваных, пришол час выявити, в чыіх руках того вечера найдут ся дві статуі – Міст Старосты і Проліта Моста Старосты, на што ждали прибывшы, выполняючы до осатніх місц салю Двору Карвациянів в Ґорлицях. О хвилю Мария Ґубала вручыла тоту першу, головну Анні Бухман зо Швейцариі, а другу – Проліт Моста Старосты – радию лем.фм, та вручыла выріжніня вшыткым номінуваным.

Вчас презентациі радия лем.фм, Даміан Трохановскій дакус жартібливо оповіл о початках радия і – як сам бесідувал – о недовірю, же такє може ся выполнити. Спомнул на 2010 рік, коли в великій таємници дознал ся од Павла Малецкого о плянуваній товдышнім шефом Руской Бурсы, Богданом Ґамбальом, ініциятиві, основати лемківскє радийо. Тото конче ся довело уж онедолга, коли в 2011 році выстартувало радийо, одраз по ним інформацийный порталь lem.fm і дальшы акциі, маючы як першу ціль всокотити лемківскій язык і культуру. Ведучый Руской Бурсы і шефредактор інформацийного порталю припомнул, чым ся гордит як раз днес – молодыма людми, якы приходят до редакциі, реалізуют ся в творіню сучасных русиньскых медий.

Нагороды Мосты Старосты передаваны сут од 2001 рока творцям культуры і активістам, жыючым на ґорлицкій земли, або і тым, што сут з ньом прямо звязаны. Спосеред лемківскых выріжненых спомянути мож м.ін. на Павла Стефановского, Ярослава Трохановского, Юлию Дошну, Романа Корбича, Анну Дубец, о. Романа Дубеца, а вартат підкрислити, же влони лавреатом головной нагороды Міст Старосты остал знаный фольковый ансамбль Серенча. Од 2011 рока Староство передає тіж специяльну нагороду – Проліт Моста Старосты (як з польского перевеме нагороду о назві Przęsło Mostu Starosty), якой лавреатами того рока остали як раз мы. Дякуєме і ВАМ, нашым вірным слухачам, бо то предовшыткым ВАША нагорода, котром і мы горды.

© Starostwo Powiatowe w Gorlicach / Yvetta Walecka

© Starostwo Powiatowe w Gorlicach / Yvetta Walecka © Starostwo Powiatowe w Gorlicach / Yvetta Walecka