Радийо ЛЕМ.фм глядат 9 таємных орґанізаций

З причыны вельох звідань од слухачів нашого радия о таємне чысло 9 орґанізаций, якы мали бы поперати Штефана Гладика як свого репрезентанта в Спільній Комісиі Уряду та Народовых і Етнічных Меншын, рішыли сме зачати дошліджыня, о котрых орґанізациях бесідувал речений репрезентант на пошліднім засіданю Комісиі (текст і запис фраґментів до выслуханя/прочытаня за тым мотузком)?

Остатнім часом найбарже популярным лозунґом деякой части лемківского середовиска є прозрачніст (звана і транспарентністю), хоц тыкаюча ся такой лем фінансового фону.

Мы підеме інчым путьом. Тепер не будеме ся занимати грошами і фінансуваньом, бо они вторичны і сут нашлідством діяня каждой орґанізациі. Звідали сме лідерів лемківскых орґанізаций, што думают м.ін. о лемківскым языку і достоменности в однесіню до выповіди Штефана Гладика? І, наконец, ци находят ся в чыслі 9 орґанізаций, котрых мал бы репрезентувати (клікний на мотузок, жебы прочытати писмо)?

Не вшыткы орґанізациі нам дотепер одповіли, хоц помалы накрислят ся нам своєрідне who is who лемківского середовиска, але годни сме кус іщы пождати.

Пониже листа орґанізаций, ґу котрым выслали сме звіданя:

Ансамбль Пісні і Танця “Лемковина”
Єпархіяльний Осередок Православной Культуры ЕЛПІС
Клюб Патріотів Лемковины
Лемківскій Ансамбль Пісні і Танця “Кычера”
Стоваришыня “Руска Бурса”
Стоваришыня Лемків
Стоваришыня Лемківской Молодежы “Чуга”
Стоваришыня ЛЕМКО ТАВЕР
Стоваришыня Промоциі Лемківской Творчости “Серенча”
Стоваришыня Спераня Лемківской Культуры “Веретено”
Товариство для Розвитку Лемківской Культуры в Зындрановій
Товариство Розповсюджаня Традиций і Культуры Лемків
Фундация “Стара Дорога”

Смотрте за дальшыма подіями в тій темі. О ефектах першого (бо замірены маме і дальшы) репортерского дошліджыня будеме інформувати в ефірі радия ЛЕМ.фм і на портали www.lem.fm.