Публіковали першы резултаты зо списованя на Словакії. Без даных о народностях

На Словакії жыє 5 449 270 жытелів. З цілковой кількости жытелів є 49 процент мужів і 51 процент жен. Такы чісла выходять з першых основных резултатів тогорічного Списованя жытелів, домів і квартелів 2021.

В понедільок 20-го децембра 2021-го року о них інформовали на пресконференції представителі Штатістічного уряду Словацькой републікы. Інформацію принесла пресаґентура TASR. Даны о членах народностных меншын ці о реліґійній приналежности в першых публікованых резултатах не суть.

Словацька републіка старіє

Списованя было про Штатістічный уряд Словацькой републікы вызвов. „Усвідомили сьме собі так само много можливостей інформачных технолоґій. Електронічне списованя значно адміністратівно одлегшало жытелів країны. Далшы резултаты будеме публіковати на зачатку слідуючого року,“ повів председа уряду Александер Баллек.

Штатістічный уряд окрім даных од жытелів робив і з іншыма джерелами. „Вдяка тому сьме здобыли точнішы інформації“, повіла ґенерална директорка Секції соціалных штатістік і демоґрафії Штатістічного уряду Людмила Іванчікова.

Резултаты за їй словами потвердили тренд, же населіня старіє. В передпродуктівнім віці (од 0 до 14 років) є на Словакії 16 процент жытелів, в продуктівнім (од 15 до 64 років) 67 процент, і в попродуктівнім віці (веце як 65 років) має Словакія 17 процент населіня. „В поріваню з роком 2011 значно наросло чісло жытелів над 65 років. Видиме то у вышыткы краях, найвеце їх чісло наросло в Тренчаньскім краю,“ уточнила Іванчікова.

Аж 98,9 процента жытелів з тырвалым перебываньом на Словакії суть гражданы Словацькой републікы. З першых резултатів знаме і то, же о дашто веце жытелів, конкретно 53,2 процента, жыє в містах, 46,8 процент населіня жыє в селах.

Найвеце гражданів іншой державы жыє в Братіславім краю, найменше в Тренчаньскім.

Резултаты лем в електронічній формі

Вшыткы штатістічны даны суть доступны на вебсайті www.scitanie.sk. „Сприступньованя резултатів буде лем в електронічній формі,“ додала директорка Секції штатістікы жытелів Штатістічного уряду Зузана Подманіцька. В януарі бы мав уряд публіковати далшы даны, включно резултатів о жытелях, котры голосять ся ку окремым церьквам і реліґійным общінам.

Списованя на Словакії зачало 15-го фебруара і першый раз у своїй історії было основане на комбінації уж існуючіх даных з даныма од жытелів. Першый раз было і повно електорнічне. Самосписованя закінчіло ся 31-го марца, асістоване списованя проходило пак од 1-го апріля до кінця октобра.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА