ПСК выділив на поміч по землетрясіню 100 тісяч евр

Пряшівскый самосправный край (ПСК) выділив із свого розрахунку 100 тісяч евр на поміч людям, котрых засягло недавне землетрясіня. Грошы розділить Фундація ПСК про підпору родины меджі людей.

Як інформує аґентура TASR, посланці Заступительства Пряшівского самосправного краю то схвалили на своїм засіданю, котре одбыло ся в понедільок 23-го октобра 2023-го року.

Грошы при тім дістануть лем фізічны особы. Можуть їх схосновати на реконштрукцію дому, квартелю або на купліня заряджіня, котре было пошкоджене. Наслідно треба схоснованя грошей здокументовати.

Прибывають грошы на банковім рахунку

Справця Фундації ПСК про підпору родины Віктор Ґуман повів, же на банковім рахунку прибывають фінанції.

„Їднаме з двома великыма корпоратныма фірмами, котры нам хотять помочі. Нашым цільом є вызберати холем 150 тісяч евр, котры бы сьме хотіли такой перероздільовати. По днешнім Заступительстві ПСК вже маєме коло 120 тісяч евр і тота сума каждый день росне,“ доповнив Ґуман з тым, же ку понедільку евідовали 134 жадостей о підпору.

Єдночасно додав, же села, котры были засягнуты землетрясіньом, а не залучіли ся до меморандума о фонді, не можуть черьпати грошы з крізового фонду. Дакотры з них по выникнутю фонду у 2019-ім році ся залучіли, но наслідно перестали грошы платити.

„То лем десять центів на жытеля за рік. З крізового фонду знаме ґарантовати, же в припаді будьякой надзвычайной сітуації в данім селі або місті будеме выплачати суму 700 евр на жытеля,“ уточнив справця фундації.

Жупан вірить, же поможе і влада

Председа ПСК Мілан Маєрьскый вірить, же і нова влада выділить грошы на поміч людям по землетрясіню.

„Про нас є ключовым і днешнє узнесіня ПСК, і то, жебы влада Словацькой републікы пожадала Европску комісію о фінанчны средства в рамках Фонду солідарности Европской унії,“ повів жупан з тым, же ПСК буде правдоподобно жадати о фінанції про Вігорлатьскый музей в Гуменнім, де є шкода по землетрясіню приблизно 300 тісяч евр.

Єдночасно очекує, же в слідуючім році буде мати край свою Вызву про реґіон прямену на поміч засягнутым селам і містам, жебы годны были оправити свої школьскы або културны інштітуції.

Помагають і далшы

Людям в Пряшівскім самосправнім краю помагають і далшы доноры. О выділіню фінанчной помочі про жытелів ПСК інформовало уж скоріше Малопольске воєводство, котре має граніцю і є партнером з Пряшівскым самосправным крайом.

На неділю 5-го новембра выголосив збераня грошей у вшыткых храмах Пряшівской архієпархії апостольскый адміністратор і братіславскый єпарха, владыка Петро Руснак. Грошы мають помочі на змірніня шкод, котры зробило землетрясіня на храмах архієпархії, фарьскых будовах, але і на пріватных домах.

Фото: TASR – Марош Черный.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА