ПСК спустив свої дотачны проґрамы. Розділить міліоны евр

Пряшівскый самосправный край (ПСК) знова спустив свої дотачны проґрамы. В середу 3-го януара 2024-го року о тім інформовала Леа Леготьска із Одділіня комунікації ПСК.

Села, міста, обчаньскы здружіня, безпрофітовы орґанізації, реґістрованы церькви, юрідічны і фізічны особы з Пряшівского самосправного краю знова можуть жадати о фінанчну підпору самосправного краю, і то в штирьох ґрантовых проґрамах – Вызва посланців ПСК, Вызва председы ПСК, Вызва про реґіон і Вызва Партіціпатівный розрахунок. На загнаня жадости є часу до 19-го фебруара.

ПСК планує в тім році розділити в рамках дотацій 4 міліоны евр. Найвекша сума є алокована у Вызві про реґіон, котрой минувшый рік меджі проґрамами не было. Заінтересованы можуть здобыти підпору в области ціклотранспорту, турістічного руху і путницького турізму, так само културы, шпорту і соціалных служеб. Мінімална дотація є 15 тісяч евр, максімална аж 200 тісяч евр.

У Вызві посланців ПСК є тот рік алокованых 1,43 міліона евр, а у Вызві председы ПСК 440 тісяч евр. В обидвох проґрамах можуть заінтересованы жадати мінімално 500 евр, а максімално 5000 евр, причім суть дотації встановлены про области шпорт, култура, соціалны службы, родинна самосправа, підпора жывотного оточіня і підпора служеб в здравотництві.

Далшых 130 тісяч евр находить ся у Вызві Партіціпатівный розрахунок, в котрій о вітязных проєктах будуть вырішовати жытелі краю. Край підпорить проєкты і ініціатівы в области іновації існуючой або створіня новой публічной службы в публічнім просторі. Так само дає шансу в области ревіталізації публічных просторів ці тым, котры хотять будовати комунітну інфраштруктуру в публічнім просторі.

Вшыткы інформації о дотачных проґрамах Пряшівского самосправного краю заінтересованы найдуть на офіціалнім сайті ПСК.