ПСК оправив шкоды по землетрясіню в двох інштітуціях вдяка Підкарпатьскому воєводству

Роботы на Вігорлатьскім музею в Гуменнім і Піддукляньскім освітнім центрі у Свіднику, котры были пошкоджены почас землетрясіня у 2023-ім році, суть закінчены.

Як інфомровав Пряшівскый самосправный край (ПСК), зреконштруованы просторы собі в пятніцю 28-го фебруара 2025-го року посмотрили представителі краю, і польского партнера – Підкарпатьского воєводства, котре на тоты роботы дало фінанчну поміч в сумі веце як 138 тісяч евр.

Сімбол проглубліня нашых односин

„Мали сьме частковы інформації, же в Пряшівскім краю было землетрясіня, але не знали сьме о його великости, ани не мали зданя, же ішло о великы страты і шкоды на маєтку,“ повів у зреконштруованых просторах Вігорлатьского музея в Гуменнім маршалок Підкарпатьского воєводства Владислав Ортыл.

„Влизшы детайлы дізнав єм ся аж по стрічі з председом ПСК, і на основі тых фактів у Підкарпатьскім воєводстві прияли сьме барз скоре рішіня помочі нашому партнерьскому реґіону. Іде ту властно о співпрацу краю і нашого воєводства, і мі тота солідарность барз любить ся,“ продовжовав маршалок.

За його словами обидва тоты реґіоны капчать довгодоба співпраца, наприклад в области драговой інфраштруктуры, турістічно руху, але тото было першый раз, коли воєводство краю помогло такым способом.

„Тото ґесто спринимаме як сімбол проглубліня і потверджіня нашых односин,“ закінчів Владислав Ортыл.

Найвекше пошкоджіня од 1947-го року

Пошкоджіня ренесанчного каштеля в Гуменнім, в котрім має свої просторы музей, были што до природных катастроф найгіршы од 1947-го року, коли із доднесь непоясненых причін згоріла стріха той народной културной памяткы.

Землетрясіня теперь запричінило великы шкоды на будові – пуклины на стінах в 35-ох містностях, пуклины на фасаді ітд. Реконштрукція за веце як 133 тісяч евр обсяговала ставебны роботы, умелецько-ремеселны роботы, і рештавраторьскы роботы.

Далшых понад 46 тісяч евр музей дав посередництвом розрахунку ПСК на інжінірьско-ґеолоґічны баданя, оцінкы статікы, выпрацованя проєктовой документації, як і далшы з тым повязаны діла.

Землетрясіня лем рік по реконштрукції

„Лем рік по великій і складній реконштруцкії каштеля Пряшівскый край засягло землетрясіня, котре пошкодило велику часть будовы,“ повів у пятніцю председа ПСК Мілан Маєрьскый.

Як далше інформовав жупан Маєрьскый, обновлены просторы мусив край втогды заперти, і зохабити на оцінку статікам.

„Нащастя, за помочі нашого сусіда – Підкарпатьского воєводства, подарило ся нам тот културный пункт в куртім часі обновити так, жебы знова быв безпечный про навщівників. Барз ціню тоту поміч, котра єдночасно потвердила стару познату пословіцю – в нужді знаш приятеля. І Підкарпатьске воєводство є такым приятельом,“ повів далше жупан.

Будова пошкоджена і у Свіднику

Піддукляньскый освітній центер у Свіднику мав по землетрясіню пуклины на стінах, головно в части, де є споїня меджі старов і новов будовов. Пошкоджены были і ґарадічі ці далшы части інтерьєру. Реконштрукція подарила ся за майже 49 тісяч евр вдяка черезгранічній помочі і фінанціям пряшівской жупы.

Підкарпатьске воєводство дало Пряшівскому самосправному краю фінанції в сумі понад 600 тісяч злотых, што є веце як 138 тісяч евр. Перед тым быв підписаный Договор о фінанчній помочі в повязаню із природнов катастрофов, котрый підписали партнеры іщі в юні 2024-го року.