Пряшівскый край дасть на дотації 4 міліоны евр. Господарити буде із 275 міліонами

З розрахунком понад 275 міліонів евр буде у 2024-ім році господарити Пряшівскый самосправный край (ПСК). В порівнаню з тым роком є то о 14 міліонів веце.

В понедільок 11-го децембра 2023-го року о тім вырішыли посланці Заступительства ПСК на своїм посліднім тогорічнім засіданю. Подля ведучого Одділіня фінанцій Уряду ПСК Петра Макары было складным поскладати розрахунок.

„Меджірічно нам ішли горі мзды, вытраты на ход повязаны з енерґіями, але і зо звычайным утримованьом, зато было складным поскладати звычайный розрахунок,“ повів і доповнив, же не хотіли моментално робити прінціпіалны крокы, котры бы значіли пропущіня людей з роботы або запераня дакотрых орґанізацій, котрых є ПСК зряджовательом.

Выділили і грошы на дотації

Як інформовала Леа Леготьска з Одділіня комунікації ПСК, і у 2024-ім році крайска самосправа підпорить добры проєкты в реґіонах. Цілково ся на дотації выділили 4 міліоны евр, і заінтересованы будуть годны жадати о фінанчну підпору од 2-го януара 2024-го року, о чім так само вырішыли посланці на децембровім засіданю.

Найвысшу суму – два міліоны евр, посланці схвалили у Вызві про реґіон. Села, міста, обчаньскы здружіня, безпрофітовы орґанізації, реґістрованы церькви, юрідічны ці фізічны особы з Пряшівского краю будуть годны жадати край о дотацію на свої проєкты в штирьох проґрамах.

Конкретно іде о ціклотранспорт, турістічный рух і путницькый турізм, културу а шпорт, і соціалны службы. Мінімална дотація в тій вызві є 15 тісяч, максімална 200 тісяч евр.

У Вызві посланців ПСК є алокованых 1,43 міліона евр, і у Вызві председы ПСК 440-тісяч евр. В обидвох дотачных проґрамах можуть заінтересованы жадати мінімално 500 евр а максімално 5000 евр, і то в проґрамах шпорт, култура, соціалны службы, родинна самосправа, підпора жывотного оточіня і підппора служеб у здравотництві.

Термін на передкладаня жадостей у вшыткых трьох споминаных вызвах є до 19-го фебруара 2024-го року.

Партіціпатівный розрахунок

Посланці ПСК схвалили і 130 тісяч евр на Вызву Партіціпатівный розрахунок, котра є заміряна на реалізацію общехосенных проєктів і общехосенных служеб з цільом залучіти до вырішованя о вітязных замірях жытелів краю.

Край притім підпорить проєкты і ініціатівы в области іновації існуючой або створіня новой публічной службы у публічнім просторі. Так само дає шансу проєктам в области ревіталізації публічных просторів або тым, котры хотять будовати комунітну інфраштруктуру в публічнім просторі.

До вызвы можуть залучіти ся обчаньскы здружіня, безпрофітовы орґанізації, Словацька рада родічовскых здружінь, реґістрованы церькви і реліґійны общіны, котры мають свій центер на теріторії Пряшівского краю, або в нім діють.

Сума дотації на єдну жадость є 10 тісяч евр, і заінтересованы будуть годны подавати в тій вызві жадости до 19-го фебруара.

Далша поміч по землетрясіню

На засіданю Заступительства ПСК была схвалена і далша поміч про теріторії, котры постигло октоброве землетрясіня. Вдяка корекції розрахунку і ціленій дотації схваленій крайскыма посланцями посередництвом Фундації Пряшівского самосправного краю про підпору родины буде мочі розділити ся далшых 150 тісяч евр.

Фінанції поможуть нелем фізічным особам, але і селам а парохіям, котры потерпіли шкоды по тій природній катастрофі. Дотація 150 тісяч евр є выключно із джерел ПСК.

Точный механізм перерозділіня сваленой дотації буде предметом засіданя Справной рады фундації. ПСК і його фундація в справі підпоры доткнутых фізічных і юрідічных особ притім рахує і з далшыма формами помочі. Іде о авізовану поміч з боку словацькой влады, спонзорьскы дары і дары од людей, але і о поміч з бізнісовой сферы.