Пряшів, Новый Санч і Ряшів хотять обновити Via Regalis

Як інформує Пресове одділіня Пряшівского самосправного краю (ПСК), Крайскый музей в Пряшові вступує до проєкту Via Regalis – Середньовіке споїня Пряшова з польскыма містами в рамках вызвы Проґраму Interreg Польща – Словакія 2021 – 2027.

На своїм засіданю 15-го апріля 2024-го року то схвалили посланці Заступительства Пряшівского самосправного краю.

Єдночасно схвалили фінанції в сумі майже 20 тісяч евр на співфінанцованя, причім ся очекує цілкова сума проєкту коло 100 тісяч евр. 80 тісяч евр на проєкт партнеры дістануть од Европского фонду реґіоналного розвитку.

Основнов ідейов проєкту, котрого партнерами суть Окружный музей в Новім Санчу і Окружный музей в Ряшові, є бывше існованя Via Regalis – кральовской обходной пути. Путь капчала міста од Пряшова через Сабінів, Стару Любовню, Спішску Стару Вес, Старый Санч, Новый Санч аж до Кракова.

Via Regalis хосновала ся од середньовіку аж по нововік, а была вызначным споїньом теріторій днешньой Словакії і Польщі. Служыла на транспорт звычайных, но і цінных недоступных товарів.

„Вызначно помагала і шыріню а мішаню звыків, ремесел, традіцій жытелів приграніча почас віків. Актівности проєкту поможуть шырити освіту, знаня, інформації і проглубити знаня сполочной културной дідовизны і ремесел, котры были на обходній пути цінены цілы столітя,“ інформує ПСК.

В рамках проєкту в Крайскім музею в Пряшові приготовить ся довгодоба выстава і творчі варштаты о середньовікій пути, котру наслідно будуть видіти і заінтересованы в Польщі. Окрім того зреалізує ся середньовікый ярмарок в Палаці Ракоція, в котрім є Крайскый музей в Пряшові, якый має перепоїти ремеселників, художників і навщівників на єднім місці.

Далшым выступом проєкту буде варштат партнерів заміряный на співпрацу партнерскых музеїв.

„Проєкт своїма черезгранічныма актівностями поможе укріпіти роль културы і утримательного турістічного руху. Дасть так само можливость шырити знаня о інтерреґіоналных скапчанях меджі країнами в повязаню з реґіоном і історічныма знанями, шырити знаня в шпеціфічній темі, котров є кральовска обходна путь,“ пише ПСК, котрый є зряджовательом Крайского музея в Пряшові з тым, же ся укріплять і черезгранічны партнерства в области музейницьтва і додаваня публічных служеб.

Фото: Палац Ракоція в Пряшові. Жрідло: ПСК.