Пряшів днесь привитав патріарху

Вчера на Словакію пришов ґрекокатолицькый (мелкітьскый) патріарха Антіохії і цілого Выходу, Александрії і Єрусалима з центром в Дамашку, його блаженість Ґеорґій ІІІ. Лагам. Патріарха навщівив Словакію на основі позваня підпредседу словацького парламенту Яна Фіґеля і ґрекокатолицького метрополіты і пряшівского архієпіскопа высокопреосвященого Йоана Бабяка.

В першый день свойой навщівы патріарха стрітнув ся, окрім іншого, із міністром загранічных діл Словацькой републікы Мирославом Лайчаком, котрый му передав сімболічный шек на 10 000 евр, котры мають служыти на поміч войнов постигнутых людей в Сірії. Потім мав патріарха в просторах Прімаціалного палаца в Братіславі лекцію на тему під назвов Пронаслідованя хрістіанів – як їм помагати.

Днесь патріарха продовжує свою навщіву в Пряшові. Окрім пріватных стріч є приготовленый і проґрам про верейность. Наперед о 14.00 год. буде проходити стріча з бісідов у авлі Ґрекокатолицькой теолоґічной факулты Пряшівской універзіты в Пряшові. О 16.30 год. буде патріарха вєдно пряшівскым архієпіскопом і далшыма владыками служыти церьковнославяньску архієрейску літурґію в Катедралнім соборі св. Йоана Крестителя в Пряшові.

Пресова аґентура Ґрекокатолицького архієпіскопства в Пряшові пише, же навщіва патріархы є нагодов, жебы віруючі были чутливішы про потребы тых, котры в Сірії і в многых далшых державах терплять про свою віру. На Квітну неділю, котра была 29. марца 2015 (за новым календарьом), ґрекокатолицькы віруючі Пряшівской арієпархії приспіли сумов 17 000 евр на збірку, котра была якраз на поміч про пронаслідованых хрістіанів.

Патріарха Ґеорґій ІІІ. Лагам днесь не є в Пряшові першыраз. Центер ґрекокатолицькой метрополії на Словакії на позваня владыкы Йоана навщівив уж і в 2006 році. Днесь його навщіва Словакії кінчіть.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА