Пряшівщане будут лікуваны в ґорлицкым шпытали

В звязку з пандемійом коронавіруса, Польща, яка має іщы свобідны місця в шпыталях, прийме заграничных пациєнтів, якы будут потрібувати медичной помочы. Премєр Матеуш Моравєцкій запропонувал такє розвязаня м.ін. Словакам і Чехам. Першы словацкы пациєнты мают трафити і до ґорлицкого шпыталя.

За інформациями подаваныма локальным інформацийным портальом www.halogorlice.pl, в віторок, 2. марця 2021 р., до ґорлицкого шпыталя має быти принятых першых штырьох пациєнтів зо Словациі, якы хворіют на коронавіруса. Перше передвидувано, што хворы будут перетранспортуваны ден скорше, но остаточно шпыталь заявил, же принятя пересунуло ся о ден.

За доступныма інформациями, першыма заграничныма пациєнтами ґорлицкого шпыталя мали бы быти Пряшівщане. Сут в тяжкым стані, підлучены до респіраторів. На Словациі бракує місц в шпыталях, в якых можливе є лікуваня коронавіруса.

Пропоминаме, што актуально в обох державах ситуация єст барз тяжка, а чысло хворых жытелів дале ся збільшат. Згідні з бесідами представників польской і словацкой страны од початку марця малопольскы шпыталі зачынают принимати словацкых пациєнтів в найгіршым стані. Перше хворы кєруваны будут до шпыталів в Новым Торгу і Ґорлицях, пак быти може до Крениці. Бесіды з чешскыма властями в тій справі тырвают.