Проєкция фільму «Перемінены през Талергоф» в Брексвіль (ЗША)

В неділю, 18. жолтня (октобра) т.р., в бібліотеці в Брексвіль, штат Огайо (Brecksville, Ohio), одбуде ся проєкция документального фільму «Changed by Thalerhof»/«Перемінены през Талергоф». Початок од 14.00 год. Вступне дармо.

Орґанізатором єст Карпаторусиньскє Общество, одділ Клівленд (Cleveland Chapter of Carpatho-Rusyn Society).

Премєра фільму мала місце, 7. марця 2015 рока, о 13.30 год. (за місцевым часом) в Wayne Public Library в ЗША і о 15.00 год. (за лемківскым часом) в Рускій Бурсі в Ґорлицях. Авторами фільму сут Джон Ріґетті і Мария Сільвестрі. Рецензию з премеєры в РБ найдете за тым мотузком. «Перемінены през Талергоф» то фільм, котрий є присвячений 100. річниці сотворіня першого в Европі концетрацийного лаґру. Двадцет сім років перед Аушвіц створено лаґєр Талергоф. Першыма людми, котрых інтернували в тым лаґрі, был нарід з пілнічно-східніх реґіонів Австро-Мадярского Цисарства – Карпаторусины. В фільмі маме змогу видіти знаны персоны, науковців, котры наштоден занимают ся русиньскыма справами.

Продуценты – Мария Сільвестрі і Джон Ріґетті працуют уж над новым фільмом. Тепер зберают материялы на документальний фільм про траґічну Акцию «Вісла». Три тыжні тому іздили по чужыні, де нагрывали спомины выгнаных Русинів, а при нагоді провели бесіды з представниками першого і другого поколіня осіб, народженых уж на землях выгнаня. Пак рушыли на Лемковину, жебы гын провести подібны інтервю, жебы потім схоснувати в фільмі. По дорозі пристанули в Кракові, де бесідували з науковцями і істориками на тему выгнаня в 1947 році.

Можете одвидіти тіж фейсбуковий фанпейдж фільму і офіцияльний інтернетовий сайт фільму.

А гев – фільм «Changed by Thalerhof» в сервісі YouTube: