Проти войны дав выголошіня і Карпаторусиньскый научный центер ці русиньскы писателі

Цілый вікенд по зачатку російской аґресії, яка напала на Україну, приходили выголошіня русиньскых орґанізацій, котры высловльовали свою солідарность з Українов і одсудожвали крокы Російской федерації.

В понедільок 28-го фебруара 2022-го року коротке выголошіня загнав і Карпаторусиньскый научный центер із Споєных штатів Америкы.

Центер, як ся пише у выголошіню, „высловлює солідарность із нашыма колеґами, приятелями і родинов на Україні, што ся геройскы борють проти російской аґресії.“ Центер підкреслив, же підтримує теріторіалну цілость Україны, і одсуджує діяня російской влады.

„Будеме і надале выступати за слободну демократічну Україну“, закончує своє выголошіня научный центер.

День перед тым, 27-го фебруара, публічно высловив ся і Іван Бузаш (Бинячовскый), член презідії Союзу русиньскых писателів Закарпатя (Карпаторусиньского літературного общества) і член презідії Народной рады Русинів Закарпатя.

Бузаш так само підкреслив, же орґанізація солідарізує з україньскым народом, а кедьже і підкарпатьскы Русины суть гражданами той самой державы, писателі одсуджують будьяку войнову аґресію – будьякы войновы дії, котры суть направлены на зничіня будькотрого народа.

„І мы вшыткы члены СРПЗ выступаме за скоре заставліня той великой біды, як стала у нас на Україні, і просиме вшыткых нашых братів діяти нам на поміч,“ написав у своїм выголошіню Бузаш.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА