ПроРусин / Трансльокациі карпатскых церкви – середа, 20.00 год.

В проґрамі омовлено історию выбраных церковных обєктів в Карпатах, якы были трансльокуваны. Зосереджено ся головні на тых обєктах, якы переношены были в XVIII ст., особливо тых о трансграничным характері, та на ратунковых трансльокациях веденых од 20. років ХХ ст.

Коли смотриме на церкви, легко однести вражыня, же в даным місци находили ся од все. Єднак кєд ближе призераме ся іх істориі, часто вказує ся, же даний обєкт был переношений, некотры – аж і по пару разів. Особливо інтересуючы сут транскарпатскы переносины, вчас котрых трансльокувано церкви з пілночы на полудне. В проґрамі буде про історию переносин церкви з Підкарпатской Руси на обшыр Чех і Морав в меджевоєнным періоді, з Габуры на Пряшівскій Руси до Градця Кральового, та про історию парократного демонтуваня і складаня в ріжных місцях церкви з Радоцины на Лемковині.

Премєра проґраму в середу 6. вересня/септембра о 20.00 год., повторіня вночы з середы на четвер о 4.00 год. та в суботу 9. вересня/септембра о 15.00 год.