Проґрам Театру Александра Духновіча в Пряшові на місяць септембер 2022

7-го септембра 2022

Детектор лжи (Велика сцена, 19.00 год.)

Повісте собі, же о манжелстві знате вшытко? Досправды то так є? Або… може о манжелстві не знаме абсолутно нич? І манжелство може быти єдна велика незнама… А притім прекрасна комедія! Находиме ся в обывачці єдного класічного панелакового квартелю. Пані Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити справы, котры суть на першый погляд баналны. А пізніше і фаталны. Бо уж по хвілі знайде ся меджі небом і земльов. Ліпше повіджено – посеред таємніць тридцятьрічного манжелского одношіня. Тадь хто бы ся сперав покушіню спознати істинну правду і скрыты світы свого ціложывотного партнера? Нихто. І втогды ся іщі лем почнуть діла! Минулость шокує нашых героїв, метать їх до неочекованых сітуацій. Но публіка ся барз файні бавить! Та ці то в жывоті аж така перемога? Дізнати ся о нашых близкых досправды вшытко? Тверду правду? Як скінчіть тота сеанса несподіванок? Подарить ся загасити тот ґротесковый пожар манжелскых боротьб? Буде годен в многім простодушный гіпнотізер втечі із пазурів манжелского абсурду? Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавліню ся. На дінаміці акторьской кооперації, іскривости словных несподіванок. Значіть! Театралный вечур повный доброй забавы, усміху, котрый вам з часу на час замерзне на роті, сміху і радостного обчутя ся може зачати!

9-го септембра 2022

Пісковиско (Мала сцена, 19.00 год.)

Коли доростаме? І што то властно дорослость є? І є властно жадана в добі гіперреаліты, коли уж не мож точно повісти, што є досправдове і што фіктівне? Коли перебераме одповідность за властны чіны? Докажеме дати явно знати свої чувства? Тужыме іщі по тырвалых односинах? Не сьме і в дорослости все дітми і в дітинстві дорослыма? Суть ВІН і ОНА іщі досправдовы, або то вже лем знакы у віртуалнім світі? Найліпша пєса (гра) 21-го столітя про двох акторів (грачів).

14-го септембра 2022

Червена калина (Велика сцена, 19.00 год.)

Темы любви і войны капчають ся в творах Василія Шукшіна в ґротесковім образі нашой добы, де головный герой Єґор глядать новый жывот як рецідівіста пропущеный з арешту. В тій драмазітації його траґікомічных оповідань і новел крыє ся правда о індівідуалности вояка, котрый по войні залучать ся до сельской соціеты. Червена калина – то сімбол гріху, од котрого Єґор буде пробовати очістити ся, і знова найти свою достойность.

21-го септембра 2022

Любов до ближнього (Велика сцена, 19.00 год.)

Театер Александра Духновіча представлює інсценацію од єдного із найзнамішых російскых драматіків 20-го столітя Леоніда Николаєвіча Андреєва. Тота комедія вказує на абсурдность нашого світа і нонсенс жывота, де трафунковы поставы чекають на смерть нещастливця коло вычапу і страчають чутя і любов до ближнього.

28-го септембра 2022

12 стілців (Велика сцена, 19.00 год.)

Рафінована карікатура совітьской сістемы і людьского ненажерства ся злучує в історії Іпполіта Воройбанинова і великого комбінатора Остапа Бендера, котрых наганяня ся за скарбом приведе до різных небезпечных і комічных сітуацій.

Выступліня ТАД мімо Пряшів

2-го септембра 2022

Фараоны (Културный дім Страняны, 17.00 год.)

Фунґованя колхозу, в котрім панують класічны стереотіпы о діліню роботы на хлопску і женьску, нарушыть єдного рана вість і вычеряню позіцій. Там, де стояли хлопи, будуть жены і наопак. Што ся стане, кедь хлопи – функціонарі, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.

3-го септембра 2022

Зістали за дураків (Културный дім Пстрина, 17.00 год.)

Україньскый комедіоґраф Марко Лукич Кропивницькый представлює ся в Театрі Александра Духновіча далшов комедійов. 12 дівок на оддаваня, но жаден жених, холем не на першый погляд. Богатый млинарь Кукса і його сусід, коваль Дранко, суть безнадійны в гляданю богатого мужа про своє велике потомство, но не знають, же жены ся о себе знають постарати самы, і поміч од отців їм нияк не треба.

4-го септембра 2022

Зістали за дураків (Културный дім Бенядиківці, 14.00 год.)

6-го септембра 2022

Червена калина (Културный дім Снина, 18.00 год.)

 8-го септембра 2022

Червена калина (Културный дім Меджілабірці, 17.00 год.)

11-го септембра 2022

Любов до ближнього (Културный дім Нижній Комарник, 16.00 год.)

16-го септембра 2022

На ревізію (Културный дім Тополя, 18.00 год.)

Остра сатірічна комедія о жывоті і роботі сільского старосты і о тім, як рішыв проблемы сільскых людей. В пєсі найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.

17-го септембра 2022

Зістали за дураків (Културный дім Гостовиці, 17.00 год.)

18-го септембра 2022

Детектор лжи (Културный дім Няґів, 15.00 год.)

24-го септембра 2022

Зістали за дураків (Културный дім Убля, 17.00 год.)

25-го септембра 2022

Зістали за дураків (Културный дім Раківчік, 17.00 год.)

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА