Проґрам Театру Александра Духновіча в Пряшові на місяць май 2025

6-го мая 2025

Детектор лжи (Велика сцена, 19.00 год.)

Повісте собі, же о манжелстві знате вшытко? Досправды то так є? Або… може о манжелстві не знаме абсолутно нич? І манжелство може быти єдна велика незнама… А притім прекрасна комедія! Находиме ся в обывачці єдного класічного панелакового квартелю. Пані Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити справы, котры суть на першый погляд баналны. А пізніше і фаталны. Бо уж по хвілі знайде ся меджі небом і земльов. Ліпше повіджено – посеред таємніць тридцятьрічного манжелского одношіня. Тадь хто бы ся сперав покушіню спознати істинну правду і скрыты світы свого ціложывотного партнера? Нихто. І втогды ся іщі лем почнуть діла! Минулость шокує нашых героїв, метать їх до неочекованых сітуацій. Но публіка ся барз файні бавить! Та ці то в жывоті аж така перемога? Дізнати ся о нашых близкых досправды вшытко? Тверду правду? Як скінчіть тота сеанса несподіванок? Подарить ся загасити тот ґротесковый пожар манжелскых боротьб? Буде годен в многім простодушный гіпнотізер втечі із пазурів манжелского абсурду? Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавліню ся. На дінаміці акторьской кооперації, іскривости словных несподіванок. Значіть! Театралный вечур повный доброй забавы, усміху, котрый вам з часу на час замерзне на роті, сміху і радостного обчутя ся може зачати!

7-го мая 2025

Ла музика (Мала сцена, 19.00 год.)

Оріґінално по словацькы написана драма, котра на судьбі єдной родины захоплює дії майже цілого 20-го столітя. Інтересность той драмы є в тім, же музика, котра є обще спринимана як култівачный фактор сполочности, в тім припаді стає ся причінов траґедії цілой фамелії.

13-го мая 2025

Руковины на Гончарівці (Велика сцена, 19.00 год.)

Oдарка цілый час вадить ся із своїм мужом, бо Прокіп пє. Кедь їм запропонують оддати свою дівку Уляну за дурного Стецька, згодны суть, бо тот є холем богатый. Але сердце Уляны вже давно здобыв собі бідный Олексій. Руковины ближать ся, но як ся бісідує, сердцю не розкажеш. Што выдумать залюблена пара, жебы планы родічів не зопсули їх щастя? Пєса україньского прозаіка і драматурґа Григорія Квіткы-Основяненка днесь належыть меджі класіку. На першый погляд легка комедія о любви одкрывать важны вопросы о рівности людей, о родинных односинах але і о значіню простого людьского щастя.

14-го мая 2025

Пісковиско (Мала сцена, 19.00 год.)

Коли доростаме? І што то властно дорослость є? І є властно жадана в добі гіперреаліты, коли уж не мож точно повісти, што є досправдове і што фіктівне? Коли перебераме зодповідность за властны чіны? Докажеме дати явно знати свої чувства? Тужыме іщі по тырвалых односинах? Не сьме і в дорослости все дітми і в дітинстві дорослыма? Суть ВІН і ОНА іщі досправдовы, або то вже лем знакы у віртуалнім світі? Найліпша пєса (гра) 21-го столітя про двох акторів (грачів).

15-го мая 2025

На ревізію (Велика сцена, 19.00 год.)

Остра сатірічна комедія о жывоті і роботі сільского старосты і о тім, як рішыв проблемы сільскых людей. В пєсі найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.

21-го мая 2025

Мерькуйте на Флорес (Велика сцена, 19.00 год.)

Як часто ся жена чує быти женов? Од чого залежыть чувство щастной і чарівной левітації? Твор Ніла Саймона занимать ся тыма в сучасности найважнішыма вопросами. Тадь выважене взаємне діяня сил їн і ян у козмосі є резултатом складной роботы над собов, над свойов особностьов, над своїм жывотом. І намагати мають ся так жены, як і хлопи, бо танґо танцюють у парі. Головна геройка знайде ся осамочена із своїм середнім „неліквідным“ віком, і своїма свіжыма болістныма розходами. Здає ся, же жывот ся заставив, і вшыткы выроблены схемы комфортного існованя згоріли в поломінях обставин. Могла бы ся зломити і зненавидіти свою долю. Лемже… судьба дарує жені три шалены приятелькы, і двох горячіх іспаньскых любителів жывота. Як скінчіть тота iнтересна комедія, і ці научіть ся Флорес чути ся щастливым і чарівным квіточком, дізнаме ся по посмотріню пєсы. Тото представліня є скапчаньом прекрасного гумору, невычерьпной мудрости бытя а любви до жывота і до себе.

22-го мая 2025

Фараоны (Велика сцена, 19.00 год.)

Фунґованя колхозу, в котрім панують класічны стереотіпы о діліню роботы на хлопску і женьску, нарушыть єдного рана вість і вычеряню позіцій. Там, де стояли хлопи, будуть жены і наопак. Што ся стане, кедь хлопи – функціонарі, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.

28-го мая 2025

Щастна выгра (Велика сцена, 19.00 год.)

Шалена комедія із сучасности о небезпечні силній тузі за ліпшым жывотом. За щастьом і грошами. Нова історія манжельской пары Надежды і Бориса (познатых із комедії Детектор лжи), котры знова пережыють невіроятный вечур у своїм обычайнім панелаковім квартелю. Бо Надежді і Борисови сповнив ся сон: выграли астрономічну фінанчну суму в лотерії. Конечно суть богаты! Конечно перервуть рабскы ланцы, котры звязують їх нудны жывоты. Конечно Всевышній выслухав молитвы Надежды, і послав їм выгру, котру нихто не чекав. Святкованя выгры тырвало цілу ніч. Але рано ся солодкый сон мінить на кошмар. Выгерный тікет пропав. Просто счезнув. Або го якыйсь завистник вкрав?

29-го мая 2025

О шкодливости табаку (Мала сцена, 19.00 год.)

Скапчаня єдноактовкы Чехова з назвов О шкодливости табаку з його ранніма гуморесками подає траґікомічну боязливу сповідь курячого з пасії – Івана Івановіча Нюхина, колись сниючого о великых ділах, а днесь нещастного боягуза, тіпічного хлопа під папучов, сниючого о выслободжіню спід надвлады свойой деспотічной жены, але ку тому може помочі лем чудо.

Выступліня ТАД мімо Пряшів

10-го мая 2025
Фараоны (Културный дім Пыхні, 18.00 год.)

11-го мая 2025
Головный тарабанщік (Културный дім Кечківці, 14.00 год.)

Пєсу Головный тарабанщік Александер Духновіч написав у 1852-ім році, но темы, котры в ній одкрывать, суть веце як актуалны. Тадь припады здобыти функцію ці тітул не найчестнішыма способами видиме і днесь. Любов двох молодых людей все належыть до тых найчістішых чувств. Почливость до родічів є моралным імператівом. А рівноправность каждого чоловіка, каждого народа, доднесь не є вырішеным, закінченым ділом.

17-го мая 2025
Руковины на Гончарівці (Културный дім Баєрівці, 18.00 год.)

18-го мая 2025
Руковины на Гончарівці (Културный дім Нижня Полянка, 15.00 год.)

25-го мая 2025
Руковины на Гончарівці (Културный дім Хмельова, 15.00 год.)

31-го мая 2025
Руковины на Гончарівці (Културный дім Тополя, 18.00 год.)