Проґрам Театру Александра Духновіча в Пряшові на місяць септембер

3. 9. 2014

Спросины, Медвідь

Тоты пєсы ся часто грають як части єдного представліня. Звязує їх сполочна тема – одношіня мужа і жены, котре ся формує  через здолаваня баналных і безсмыселных барьєр і котре наконець завершыть ся взаємнов сімпатійов. Далшым сполочным меновательом тотых двох пєс є сміх, сміх од зачатку аж до кінця, якый тоты дві представліня проводить веце як столітя по сценах професіональных і аматерьскых театрів на цілім світі.

10. 9. 2014

Не чуджолож

Драматізації Толстого прославленых новел перепоєных до єдного оповіданя зо сполочным меновательом, котрым є манжелство. Не чуджолож є драматізаційов новел Родинне щастя, Діявол і Кройтцерова соната. Євґеній ся по смерти вітця вертать із Москвы на село, жебы ся постарав о банкротуючу цукрьоварню і свої сестры. Моралка на селі є інша од моралкы в місті і любовне одношіня не мож утримати в утаєности. Його сестры Катя і Маша будуть тихо бойовати о жениха, котрый є од сімнацятьрічной Машы о двадцять років старшый. По весілю приходять діти, провінчна отупность, туга по Москві і скусительтво, котры розбивають солодке родинне щастя. Толстого святы, повны ідеалів, увязнены во фабриці ілузій, крегкых снів із цукрю і богатой фантазії, боюють проти діяволови в собі, жебы зістали перед остатніма непосквернены.

17. 9. 2014

Кырхень Безсмертный

Кырхень Безсмертный є пєса Евы Маліті Франьовой, словацькой драматічкы. Є то маґічна і крута траґікомедія із селькоского оточіня, котра давать добру шансу аж в раю. Бо ту на земли ся нашыма жывотами пошырює головно зло. Зло, о котрім часто не знаме, бо снує поза хрыбеты і уха тых, котрых хоче обрати. Зло, котре є безсмертне і тяжко го загнати до гробу. В родинній траґедії авторка формує маґічно-реалістічну сновалну метафору якраз на Словеньско, на конець еры соціалізму. Кырхень Безсмертный отець родины, народа, антігерой, інтріґан, любитеь розкошу, метафора абсолутного зла, стоїть од зачатку пєсы над гробом. Але на другый світ пішле найперше вшыткых коло себе. Він сам є невыгубительный. Кырхень Безсмертный має своїх колаборантів, выховать і свого наслідника. З кінцьом соціалізму ся не выгубило плане коріня нашой сполочности і ледво їх выгубиме з приходом іншакой културно-сполоченьской еры. Бо суть закорінены глубоко в народі, на селі, в родинах.

24. 9. 2014

Літній день

Літній день є пєса польского автора Славоміра Мрожека. Двоми хлопи ся стрітнуть в дожываючім приморьскім місці по сезоні. Обидвоми суть приготовлены убити самых себе. Єдному з них ся в жывоті абсолутно не веде добрі. Другый ся на то, жебы быв успішный, не мустить абсолутно намагати. Їх сполочну дяку скінчіти зо жывотом але перерве приход незнамой дамы. Хто з них є досправды тым нещастливішым? І кому ся подарить здобыти прекрасну даму?

Представліня ся все зачінають о 19.00 год.

Представліня ТАД-у мімо Пряшів:

7. 9. 2014 – Спросины, Медвідь, Културный дім Валковце, 15.00 год.
9. 9. 2014 – О двох ґенералах, Културынй дім в Старій Любовні, 18.00 год.
20. 9. 2014 – Тяпаковци, Културный дім Збой, 18.00 год.
21. 9. 2014 – Спросины, Медвідь, Културный дім Брусниця, 15.00 год.
27. 9. 2014 – Спросины, Медвідь, Културный дім Рокитовець, 17.00 год.
28. 9. 2014 – Літній день, Културный дім Грабске, 14.00 год.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА