Проґрам Театру Александра Духновіча в Пряшові на місяць новембер 2015

4-го новембра 2015

Америка (Велика сцена, 19.00 год.)

Прославленый роман Франца Кафкы є оповіданьом о шістьнадцятьрічнім Карлови Россманови, котрого родічі пішлють на шыфі до Америкы, бо в Европі мав одношіня зо старшов служницьов. Молодый, нескушеный і наівный Карел по тім, што выступить зо шыфы в Америці, в Ню Йорку прожывать взоступы і паданя, дякуючі своїй довірливости ід людям. Ставать ся частьов світа з абсурдныма і присныма правилами, котры мусить акцептовати, жебы в сістемі нового світа, в котрім діє сам за себе, пережыв.

6- го новембра 2015

Кідь бы пришов… (Велика сцена, 9.30 год.)

Оповіданя двох жыванів, котры ся по єднім із своїх жываньств скрыють в театрі. Ту їх найде пан Кідь бы і залучіть їх до свойой ціркусовой естрады. Найдуть там Юрко і Настка своє щастя?

11-го новембра 2015

Ковалі (Велика сцена, 19.00 год.)

Пєса сербского автора Мілоша Ніколіча є абсурднов, місцями терьпков комедійов, котра вас заведе до ковальской ділні, десь в Німецьку. В ній ся десяткы років по войні стрічають трьоми ковалі, бывшы вояци, котры вдяка „службі отцюзнині“ проплели свої долі і свої роды. Каждый забеспечів свого потомка і наслідника свойой кузні. Но як раз тота реалность їх по роках дожене до безнадії і выжадать собі їх стрічу. Но кому властно іщі потрібны ковалі і їх кузні? Чекать на вас много запліток і розузлінь.

18-го новембра 2015

„Сезон полювання на мисливця“ (Велика сцена, 19.00 год., пєса є в україньскім языку)

Каждый, хто ся намагать одкрыти двері до чуджого жывота, ріскує, же за тыма дверями зістане навсе. Фотокорешпондентка популарного журналу вырішыла зничіти таємный світ чуджой таємніці. Но не зничіть тота таємніця світ самой дівкы? Одповідь на тото звіданя – то путь смішных і несподіваных перетворінь, котрыма перейде геройка, жебы наконець зрозуміла ціну польованя на радость…

20-го новембра 2015

Златый ключік (Велика сцена, 9.15 год.)

Буратіно, головный герой приповідкы Алексія Толстого Златый ключік або Буратіновы авантуры, то жываньска, непослухняна і неконечно зведава, но напрік тому сімпатічна деревяна лялька із довгым носом, котрый як кібы быв на тото, жебы го маїтель пхав там, де не треба. Буратіно має ніс, котрый вынюхать кажду авантуру, небеспеку, но і способ, як із того добрі выйти, і не лем то – поможе му найти то, по чім вшыткы тужыме – златый ключік, котрым дадуть ся одкрыти двері до щастливого жывота….

21-го новембра 2015

Гавай (Велика сцена, 19.00 год., в рамках події Ніч театрів)

Гавай є дебутом молодой пряшівской драматічкы Михаелы Закутяньской. Траґікомедія з русиньского села із характерістічнов назвов Гавай – то суть пригоды о гляданю самого себе на періферії Европы і в кругу не цалком тіпічной родины.

25-го новембра 2015

Капітан Будзоґань (Велика сцена, 9.30 год.)

Приповідка о справедливім кральови і його трьох дівках. О бідакови дракови, котрый даремно пришов о свої головы. Приповідка зо вшыткым, што ку тому належыть – авантурoв, співанками, великым весільом і щастливым кінцьом, направду заінтересує дітячу і дорослу.

25-го новембра 2015

Окресный шпыталь (Велика сцена, 19.00 год.)

Чоловік ся ани не сподівать і зразу ся дізнать, в якім жыє маразмі. Невыразно то припоминать шаленый дім. Має лем дві можливости! Сплынути з оточіньом, або спробовати дістати ся вонка. Є дакілько драг: зміна індентічности, еміґрація, і кідь нереална, так холем до свого внутра. Можливость одмітнути жывот є основов, но не найприємнішов. Умерти на старобу, хоць є природне, но хто бы так довго чекав… Револуція? Може, але має смысел револуція в шаленім домі?

Выступліня Театру Александра Духновіча мімо Пряшів:

6-го новембра 2015 Америка, Културный дім Стара Любовня, 18.00 год.

12-го новембра 2015 Бетярькы, Културный дім Снина, 18.00 год.

17-го новембра 2015 Ковалі, Културный дім Вехець, 18.00 год.

20-го новембра 2015 Медвідь, Спросины, Културный дім Стащін, 18.00 год.