Проґрам Театру Александра Духновіча на місяць новембер

5. 11. 2014

„Шахрайки“ (пєса є в україньскім языку)

Пінязі владнуть світу… Здобыти ся дадуть нелем досправдовов роботов, але і участьов в різных конкурзах ці „reality show“. О єднім із такых способів вырішають і дві молоды україньскы дівкы. Тоты реаґують на повідомліня америцькой міліонарькы, котра вырішыла подаровати цілый маєток найсімпатічнішой лесбіцькой парі бывшого СССР. Сітуація ся комплікує, кідь Америчанка, походжіниом таксамо Українка, прийде на Україну… Пєса „Шахрайки“ сучасной україньской авторкы Наталії Уваров є повна неочекованых переломів, комічных сітуацій і несподіваного кінця.

12. 11. 2014

О двох ґенералох

О двох ґенералох є пєса на мотівы оповіданя Михаила Салтыкова-Щедрина. Герої той інсценації перекрачують помыслену лінію міджі реалітов і выдумков. І то способом ласкавым: наднесенов фантазійов. Двоми пензійонованы ґенералы привитають публіку в хыжці з адекватнов порційов мужского скаржіня, взаємным добераньом ся. З властныма снами, ці незвычайныма представами. Ґенералы ся несподівано знайдуть на пустім острові в середині моря. Їх єдиным партнером є великый їдаленьскый стіл. І публіка. І несподіваня. Чекать на вас выборна театрална забава.

19. 11. 2014

Кырхень Безсметный

Кырхень Безсмертный є пєса Евы Маліті Франьовой, словацькой драматічкы. Є то маґічна і крута траґікомедія із селькоского оточіня, котра давать добру шансу аж в раю. Бо ту на земли ся нашыма жывотами пошырює головно зло. Зло, о котрім часто не знаме, бо снує поза хрыбеты і уха тых, котрых хоче обрати. Зло, котре є безсмертне і тяжко го загнати до гробу. В родинній траґедії авторка формує маґічно-реалістічну сновалну метафору якраз на Словеньско, на конець еры соціалізму. Кырхень Безсмертный отець родины, народа, антігерой, інтріґан, любитеь розкошу, метафора абсолутного зла, стоїть од зачатку пєсы над гробом. Але на другый світ пішле найперше вшыткых коло себе. Він сам є невыгубительный. Кырхень Безсмертный має своїх колаборантів, выховать і свого наслідника. З кінцьом соціалізму ся не выгубило плане коріня нашой сполочности і ледво їх выгубиме з приходом іншакой културно-сполоченьской еры. Бо суть закорінены глубоко в народі, на селі, в родинах.

26. 11. 2014

Малый чорт

Малый чорт – то пєса на мотівы Фйодора Солоґуба. Інсценація выникла як перепис авторового роману. Зеркалить бізарне бытя глыбокой руськой провінції, де владне лож, хамелеонство і шаленість. Дія пєсы є надчасова і про нашу реалность высоко актуална. Своїм ґротескным і може аж абсурдным характером надвязує на найліпшы традіції руськой літературы.

15. 11. 2014

Спросины

Наш театер дня 15. 11. 2014 р., вынятково в суботу вечур, одограть на малій сцені єдну із Чехововых єдноактовок під назвов Спросины. Выступліня буде з нагоды одбываня події „Ніч театрів“, на котрій Театер Александра Духновіча вже традічно бере участь. Вступне в тот вечур є сімболічне 1 евро.

Представліня в Пряшові зачінають все о 19.00 год. вечур.

Представліня ТАД-у мімо Пряшів:

04. 11. 2014 – Полепетко, Културный дім Орябина, 09.00 год.

06. 11. 2014 – Золотый ключік, Културный дім Крачуновці, 09.30 год.

07. 11. 2014 – Золотый ключік, Културный дім Шарішскы Дравці, 09.30 год.

12. 11. 2014 – Золотый ключік, Културный дім Кружлів, 09.30 год.

13. 11. 2014 – Капітан Будзоґань, Културный дім Міджілабірці, 09.00 год.

13. 11. 2014 – Капітан Будзоґань, Културный дім Радвань над Лаборцьом, 12.00 год.

20. 11. 2014 – Полепетко, Културный дім Чірч, 09.30 год.

21. 11. 2014 – Золотый ключік, Културный дім Грабків, 10.00 год.

24. 11. 2014 – Ла музика, ВС ТАД Пряшів, 14.00 год.

27.11. 2014 – Золотый ключік, Културный дім Стара Любовня, 09.30 год.

28.11. 2014 – Капітан Будзоґань, ВС ТАД Пряшів, 09.30 год.