Проґрам 8. Фестівалю Калейдоскоп Культур

Як інформували сме за тым мотузком, кєд лем мал явити ся детальнійший проґрам 8. Фестівалю Калейдоскоп Культур во Вроцлаві, обіцяли сме, же принесеме го на порталь. Отже, такій проґрам уж знаме і го передаєме. Хоц не єст він іщы полний і фінальні запертий, декотры інформациі про выступуючы ансамблі і подіі можеме передати уж тепер.

Як пишут орґанізаторы на сайті фестівалю, в тым році буде розмаіто-кольорово. В тогорічній едициі рядити будут лемківскы, бойківскы, закарпатскы і гірско-вшелеякы климаты.

12. червця т.р. о 21.00 год., в Фестівальовым Клюбі Старий Кляштор, ул. Пуркінєґо 1, в панели “лемківско і джазово” выступит добрі знана слухачам радия лем.фм СУСАННА. Ден пізнійше, т.є. 13. червця, в тым самым місци о 22.30 год., в панели “Лемківско-жыдівскє афтерпарти” свій выступ даст ґрупа Дулярьовы Братя (The Dollars Brothers) і ансамбль ПРИПАДОК. 

В головний фестівальовий ден 13. червця т.р., на Слодовым Острові (Wyspa Słodowa), окрем выступів ріжных ансамблів, ґруп, будут мали місце і інчы подіі, звязаны з проходячым фестівальом. Звіздами вечера, котры заграют на 8. едициі Фестівалю Калейдоскоп Культур, будут ґрупа ЛУІКУ (Украіна), котра презентує русиньско-закарпатскій климат та ґрупа Толгаі (Польща), котра співат лемківскы і бойківскы співанкы.

Неодолга повинен ся вказати остаточний і барже детальний проґрам той медженародовой імпрезы.

Веце інформаций найдете на страні фестівалю за тым мотузком.

Фундация Калейдоскоп Культур то ініцятыва медженародового діялоґу. Головна ціль той орґанізациі то едукация для взаімной толеранциі медже народами і етнічныма меншынами. Кульмінацийным пунктом цілорічной діяльности Фундациі єст Фестіваль Калейдоспок Культур, котрий одбыват ся во Вроцлаві. Фестіваль приближат мешканцям Нижнього Шлеска традиці і культуру такых меншын як Німці, Росияне, Украіцні, Жыди, Ґрекы, Ромове, Караімы, Болгары ци Русины. Фундация Калейдоспок Культур в великій мірі причынила ся до того, же і нас-Русинів зачали достерігати в столици Нижнього Шлеска.