Професор Маґочій одпрезентовав у Пряшові історічный атлас Карпатьской Руси

У віторок 20-го юна 2023-го року одбыла ся в просторах Словацького народного музея – Музея русиньской културы в Пряшові презентація словацького выданя книжкы Карпатьска Русь. Історічный атлас професора Павла Роберта Маґочія.

Словацька верзія під назвов Karpatská Rus. Historický atlas вышла в 2022-ім році у Выдавательстві Пряшівской універзіты в Пряшові, і є перекладом анґліцького оріґіналу, котрый быв надрукованый у 2017-ім році в Канаді.

Презентацію публікації за участи автора, професора Маґочія, модеровав доцент Володимір Фенич з Ужгорода. Знамый русиньскый науковець і академік поясньовав участным на якім прінціпі были роблены окремы тексты і мапы, котры ся в книзі находять, чом собі выберав даны прінціпы, але обговорили ся і далшы темы, котры прямо або непрямо были повязаны з книжков.

По презентації подія продовжовала діскусійов, в рамках котрой могли участны класти вопросы професорови, котрый моментално передавать лекції на Studium Carpato-Ruthenorum – Меджінародній літній школі русиньского языка і културы, яка моментално проходить на Пряшівскій універзіті вже єденадцятый раз.

Як професор Маґочій прозрадив в рамках діскусії, моментално рихтує в Канаді, де жыє і є професором на універзіті, до друку далшу свою публікацію, котра має тот раз быти о карпаторусиньскім уменю.

Як сам підкреслив, тота тема іщі окремо не была оброблена в публікації, а притім уменя є про наш народ барз важным елементом. Книга є за його словами заміряна на світьске, не церьковне уменя.

О публіклації

Публікація Карпатьска Русь. Історічный атлас професора Маґочія має множество якостных історічных мап, но і текстів.

„Карпатьска Русь ся дословно находить в самім сердцю Европы. Існують докінця два памятникы збудованы в роках 1870 і 1970 у выходній части Карпатьской Руси, котры означують точный ґеоґрафічный центер европского контіненту. Карпатьска Русь є тіпічнов гранічнов теріторійов, на котрій стрічають ся ґеоґрафічны, політічны, етноліґвістічны, реліґійны і соціално-кліматічны граніці, пише ся на окладці публікації.

„Посеред той фасцінуючой розмаїтости майорітну популацію традічно творили карпатьскы Русины, котры овпливньовали решту народів жыючіх в їх сусідстві: Мадярів, Словаків, Поляків, Румунів, Жыдів, Німців, Ромів/Циґанів, а в пізнішім періоді Чехів, Українців і Росіянів.“

Карпатьска Русь. Історічный атлас дає подля выдавателя чітательови детайлны інформації о тій вынятковій комплексній теріторії.

Книга має 34 капітол із фаребныма мапами, котры хронолоґічно вказують розвиток нелем на історічній теріторії Карпатьской Руси, але і на шыршій теріторії середньой Европы. Кажда мапа є доповнена леґендов, котра приближує ґеоґрафічны, етноліґвістічны, културны і історічны повязаня.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА