Продолжат будова церкви в Ґладышові

Перед парома днями на пляцу будовы православной церкви в Ґладышові (ґорлицкій пов.) были зроблены дальшы роботы. Тым самым поступы в побудуваню нового храму посунули ся допереду.

Роботы дотуляли ся закінчыня етапу звязаного з фундаментами. Тоты были засыпаны, а земля утверджена і залята циментом. Як інформує місцева парохія, роботы проходили при прекрасній жолтньовій, сонечній погоді.

При будові новой церкви найперше і найбільше роблят самы парохіяне, якы од самого зачатку активно старают ся так само зберати жертвы на тоту ціль. Вірны дякуют самособом і ґладышівскій Охотничій Протиогньовій Стражы, яка так само влучыла ся в поміч при будові, а посліднім разом дальшый раз пожарникы помогли выпомпувати воду, яка находила ся в фундаментовій ямі.

Будова зачала ся в листопаді/новембрі 2020 р. В першым етапі, якій закінчыл кінцьом влонишнього рока, вірным повело ся выляти фундаменты. Актуальны роботы то уж дальшый етап, якій завершыл працы повязаны зо зрыхтуваньом основы під поставліня конструкциі деревяного храму.

Деревяна церков, яка стане в середині села, буде репликом неістнуючой уж церкви свв. Космы і Даміана з Незнайовы. Дотля православны селяне молят ся в деревяній каплици св. Йоана Крестителя, яка находит ся при єдным з бічных пути в середині села.

Будову ґладышівской церкви мож підпорити через жертвы вплачаны за тым мотузком. Імена офіродавців пак будут зложены під престолом.