Проблем з матурами. Матура з лемківского в липци/юлию?

Міністерство Нацийональной Едукациі змушене было з причыны пандеміі коронавіруса одкликати майовы матуральны еґзаміны. Тым самым, были они перенесены на червец/юній.

Хоц уряд влады зробил крок допереду в тій сфері, дале не подано точных дат поєдных еґзамінів. Вшытко ся выкаре протягом найблизшых тыжни.

Уж не май, а червец/юній

Премєр Польской Республикы Матеуш Моравєцкій поінфомувал на конференциі, яка проходила 9. квітня/апріля, што тогорічны матуры не одбудут ся традицийно в маю. До будучых абсольвентів середніх шкіл пішла і друга основна інформация, што еґзаміны мали бы ся одбыти в червци/юнію, але напевно не в першій половині того місяця. Тогорічный матуральный маратон мал ся зачати 4. мая і мал тырвати до 22. мая.

Заєдно ресорт одповідальный за шкільництво заявил, што школы будут дальше закрыты, покля што до 26. квітня/апріля. Навчаня ведене єст онляйн.

Матуры в червци/юнію і так не сут певны, понеже не знатя, як розвине ся ситуация з пандемійом коронавіруса. «Матуристы, ученикы остатніх кляс, хочеме, жебы сте мали долгу перспективу прирыхтуваня до еґзаміну. Поінформуєме про нову дату на три тыжні/місяц перед еґзамінами» – бесідувал Міністер Нацийональной Едукациі Дариюш Пьонтковскій.

Для тогорічных матуристів основны были і інформациі тыкаючы будучой рекрутациі на учельні. «Тото залежне од того, коли одбудут ся еґзаміны. Кєд в другій половині червця/юнія, так товды потрібне буде легкє пересуніня в гармоноґрамі рекрутаций на учельні», додал Пьонтковскій.

Лемківскій все на кінци

Покля уряд влады не подал даты тогорічных матур, не будеме знати, коли мала бы ся одбыти матура з лемківского языка. Дотля была она наплянувана на 20 мая.

Матуры з меншыновых языків все проходили на конец цілого матурального маратону. Днес можеме лем ся додумувати, же кєд матуры з основных предметів зачали бы ся в другій половині червця/юнія 2020 р., так еґзамін дозрілости з лемківского языка міг бы быти найкорше проведеный на початку липця/юлия.

Окрем писаной матуры з лемківского, в ґрафіконі матур на тот рік Міністерство передвиділо і бесідувану част. Дотля бесідуваны матуры з ріжных языків, в тым з лемківского, были офіцияльно заплянуваны на період од 7.-22. мая.