Про православны і грекокатолицкы архівалиі / реляция з промоциі книжкы др Анны Крохмаль – понедільок, 20.00 год.

Запрашаме до выслуханя реляциі з промоциі книжкы пн. Історичний архів перемышльской єпархіі. Авторка той публикациі, др Анна Крохмаль, оповідат про тото, чом рішыла написати таку книжку, в якых обставинах до того дошло і очывидні – што мож найти в публикациі. А найти мож вельо цінных інформаций, тыкаючых архівальной спадковины по Грекокатолицкым Єпископстві в Перемышли, якє находит ся тепер в Державным Архіві в Перемышли.

Історичний архів перемышльской єпархіі єст комплексовом публикацийом про найбільший в Польщы захований архів до істориі східнього християньства, не лем грекокатилоцкого, але і скорше – православного. Книжка єст свого рода путівником по цілій колекциі джерел, а попереджена єст 300-сторінным моноґрафічным описом істориі перемышльской єпархіі. Обі части, історично-описова і детальний зміст того, што крыє ся під вшыткыма сиґнатурами, дают дослідникам образ того, як выглядала істория східнього християньства в полудньово-східній части Польщы. Лемковина до 1934 рока цілістю находила ся в обшыри перемышльской єпархіі, зато і тот архів становит велику спадковину нашой істориі. Дослідничий потенциял тых материялів єст превеликій, не лем для істориків, але і для языкознавців, социйолоґів, демоґрафів, ачий музыколоґів.

Промоцийна стріча проходила 31. марця т.р. в Державным Архіві в Перемышли.

Премєра проґраму: понедільок 10. квітня/апріля о 20.00 год, повторіня в віторок 11. квітня/апріля о 2.00 год. та в суботу 15. квітня/апріля о 15.00 год.