Про названя на Лемковині – стріча з Войцєхом Крукаром

17. лютого/фебруара т.р. в Саноку будут одкрыты таємниці топоґрафічных названь на Лемковині. Др Войцєх Крукар, чловек о котрым бесідує ся, же назвал горы, выголосит прелекцию пн. Найстаршы названя місцевости Низкого Бескіду і Бєщадів та іх оддзеркаліня в сучасных названях. Стріча буде проходила в Ґобеліновій Сали Історичного Музею в Саноку, початок 17.00 год.

Войцєх Крукар – доктор наук з обшыри ґеоґрафіі, бескідскій та бєщадскій провідник, член ПТКТ (Польского Туристично-Крайознавчого Товариства), одзначений Міністром Культуры і Народового Дідицтва выріжніньом Заслужений Діяч Культуры.

Єст автором і редактором вельох туристично-топомастичных мап, туристыичных путівників, парудесятьох дописів з обшыри туристикы, крайознавства, картоґрафіі та ґеоґрафіі. Од парунадцетьох років веде соспільну документацию-реконструкцию традицийного теренового назывництва полудньово-східньой Польщы. На новы мапы Бєщадів і Низкого Бескіду вписал 8 тисячів назв, скорше было іх лем тисяч.
Більше про роботу др Войцєха Крукара писали сме гев і гев.