«Приповідкы на кажду пору рока» тішат не лем око

Варшавскій Університет во спілпрацы зо Стоваришыньом «Руска Бурса» в Ґорлицях печатали книжку з оповіданями для наймолодшых. По «Робочым зошыті до лемківского языка», то уж другє спільне выданя обох інституций. «Приповідкы на кажду пору рока» будут потіхом тіж для старшых чытателів.

«Публикация возникла предовшыткым з думком о наймолодшых, тых кус старшых, родичах і учытелях лемківского языка. Вчыня діти і молодежы рідной бесіды при помочы літературных текстів то обовязок так родичів, як і учытелів, якы мусят дбати о богатство і красу языка як вызначника нацийональной достоменности» – можеме чытати в вводным слові.

В «Приповідках на кажду пору рока» поміщены были выбраны тексты для діти публикуваны скорше в інчых выданях – в «Голосі Ватры», «Бесіді» і «Лемківскій Ластівочці» – то результат вельолітньой роботы Петра Мурянкы, якій або іх написал, або перевюл з інчых языків, або записал, або підлемківщыл, а пак опубликувал в редаґуваных собом часописах. До «Приповідок…» зобрала і списала іх Варвара Дуць, яка вєдно з Анном Масляном одповідали і за редакцию публикациі.

Выдавництво было поділене на шытрі части, згідні з поділом на поры рока: яр, літо, осін та зима. До каждой припорядкувано байкы і оповіданя, якы тематичні одповідают выбраным періодам рока. Разом єст того 28 історий, котры вчат, бавлят, зворушают, розвивают вражливіст, уяву діти, а предовшыткым – вказуют богатство русиньского языка, традиций і культуры. Выданя може быти полеготом для учытелів і родичів в выхованю діти.

Публикация має формат А4, чыслит 68 стран і окрем текстовой верствы обнимат вынятковы ілюстрациі. Мария Мальхер, яка ввошла уж в лемківскій світ через зробліня десяток образків до «Робочого зошыту до лемківского языка», раз іщы вказала, же добрі го розуміє, вплітуючы в ілюстрациі розмаіты русиньскы елементы. Вшыткы образкы намалюваны были на папери еко, што атракцийні підкрислят суровіст і простоту кредкы і крискы. М. Мальхер вродила і выховала ся в Пьотркові Трибунальскым, наштоден мешкат і робит в Познані, занимат ся ілюструваньом книжок для діти.

«Выданя ‘Приповідок на кажду пору рока’ то част нашых старань, жебы хоронити наш язык. Даєме нарядя потрібне до того, жебы го вчыти, передавати наймолодшым, а разом з ним вчыти і інчых важных елементів нашой лемківской культуры» – подают на закінчыня вводного слова редакотркы В. Дуць і А. Масляна.

На потребы домашньой і шкільной едукациі книжка є до одобраня в Рускій Бурсі в Ґорлицях. Просиме о скоршый контакт: natalia@lem.fm або тел.: +48 606 108 701.

Книжка печатана была в рамках выдавничой сериі «Наш язык», підсериі «Нашы діти» завдякы фінансуваню Фондом «Інститут Artes Liberales» і Выділом «Artes Liberales» Варшавского Унверситету.