Припомянуть собі 250 років од Віденьского сіноду

Як інформує Пресовый центер Кошыцькой єпархії, з нагоды 250-ой річніці Віденьского сіноду ґрекокатолицькых єпіскопів угорьской части Габсбурзькой монархії в днях 30-го мая аж 1-го юна 2023-го року одбуде ся у Відню споминова подія і конференція ґрекокатолицькых єпіскопів середньой Европы.

Меджі запрошеныма гостями є і архієпіскоп Клаудіо Ґуджеротті, префект Дікастерії про восточны церькви, а апостольскый нунцій у Відню Педро Лопез. Гостительом є Ордінаріят про восточных католиків у Австрії під веджіньом його ордінарія, кардінала Хрістофа Шенборна.

Цільом стрічі єпіскопів буде „діскутовати о минувшкых і сучастных душпастырьскых вызвах в дусі сінодалности“, як о тім інформовав кардінал Шенборн. Кардінал має надію, „же тота конферецнія поможе посилнити роль восточных католицькых церьквей в середній Европі в службі універзалній церькци,“ цітує карінала Шенборна аґентура Kathpress.

Владыка Ніл Лущак одкрыє подію акафістом

Тридньову подію одкырє у віторок 30-го мая молитва Акафісту ку Пресвятій Богородіці в каплічці Гофбурґ, де быв за єпіскопа рукоположеный мукачовскый владыка Андрій Бачіньскый (рр. 1732 – 1809). Акафіст буде одправляти владыка Ніл Лущак, апостольскый адміністратор Мукачовской єпархії.

В середу 31-го мая в Архієпіскопскім палаці одбуде ся научна конференція, котру одкрыє кардінал Шенборн. На конференції будуть рішыти ся окремы єпіскопскы особности з історії ґрекокатолицькых єпархій, але і літурґічны, душпастырьскы а канонічны вопросы. Рефераты будуть мати фаховці на односны проблематікы.

Конференція закінчіть ся архієрейсков літурґійов в Домі святого Штефана у Відню, котрой головным служытельом буде архієпіскоп Кіріл Ваисль, кошыцькый єпарха, і проповідь буде мати кардінал Хрістоф Шенборн.

Окдырють центер про мадярьскых ґрекокатоликів

Ціла споминова стріча буде завершена у четверь 1-го юна, кедь в Архієпіскопскім палаці стрітять ся ґрекокатолицькы єпіскопи, жебы продіскутовати інтерны вопросы жывота восточных католицькых церьквей середньой Европы.

В тот день так само в централній Ґрекокатолицькій парохії святой Варвары у Відню за участи вшыткых єпіскопів буде служыти ся Божеска ліртурґія, при котрій буде офіціално зрядженый новый пасторачный центер про мадярьскых ґрекокатоликів у Австрії. Головным служытельом буде владыка Філіп Кочіш, гайдудороґскый архієпіскоп – митрополіта.

Віденьскый сінод 1773-го року

У 1773-ім році скликала цісарьовна Марія Терезія втогдышніх ґрекокатолицькых єпіскопів угорьской части Габсбурзькой монархії на сінод до Відня.

Доднесь то єден із найважнішых історічных і леґіслатівных фундаментів про восточны католицькы церькви в середній Европі. Сінод і його заключіня были платны про втогдышні єпархії Мукачово, Крижевці і Фоґараш, котрых єпіскопи брали участь на сіноді. До 1918-го року сінод управльовав церьковный жывот у выходных католицькых церьквах в Габсбурзькій монархії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА