Пріматором в Міджілабірцях ся став бывшый функціонарь РОС

Дня 15. новембра 2014 р. проходили на Словакії комуналны вольбы. Жытелі Словакії собі выберали новых пріматорів міст, старостів сел і містьскых ці містных депутатів. В Міджілабірцях ся став новым пріматором Владіслав Вішновскый (Smer – соціална демокрація).

Вішноьовского волило 1431 воличів в Міджілабірцях. Новый пріматор быв дотеперь проєктовым манажером в Центрі першого контакту. Співпрацовав зо селами в реґіоні, знать, якы суть проблемы міста і околіці. За пріматорованя Ладіслава Демка в роках 2006 – 2010 робив во функції предносты містьского уряду. О довіру Міджілабірчанів жадав уже в комуналных вольбах перед штирьома роками. Втогды скінчів другый з рахунком 803 голосів.

Владіслав Вішньовскый быв по 10. сеймі Русиньской оброды на Словеньску, котрый проходив 11. октобра 2008 р. в Бардейовскых Купелях, зволеный за члена Выконного выбору орґанізації. Председом РОС ся втогды першыраз став Владимір Противняк. Вішньовскый в тім функчнім періоді быв і членом Коордіначного выбору за Містну орґанізацію РОС в Міджілабірцях.