«При джерелах» – світова музыка і лемківска поезия в Креници

Днес (15.09) в Креници зачынат ся Медженародовий Музычний Фестіваль «При джерелах», котрого директором і орґанізатором єст знаний во світі гушляр лемківского походжыня, др Мариюш Мончак. Аж до неділі (18.09) буде мож обзерати выняткове получыня музыкы і лемківской поезиі.

Вчас стріч, котры будут проходити в Креници (костел Вознесіня Пресвятой Дівы Мариі, Старий Здройовий Дім, Новий Здройовий Дім) і в давній церкви свв. Космы і Даміана в Бересті, выступлят лемківскы артисты: Юлия Дошна (четвер) з рецитацийом лемківской поезиі і Петро Мурянка (пятниця), котрий запрезентує свою творчіст. В наступных днях, орґанізаторы заплянували запрезентувати поезию Володислава Грабана і Богдана Ігоря Антонича. На концертах лемківска поезия буде переплітала ся зо звуками гушель, акордеону, віолі і фортепіано, будучы дополніньом і выполніньом цілости, заміреной на своєрідний мікс вказаня сучасной лемківской культуры на обшыри автохнонічных жытелів Карпат, і музыкы, выконуваной професийональныма і узнаныма в світі артистами. Лемківскє слово вызвучыт попри музыці Баха, Вєнявского, Бартока, Моцарта, Гайдна, Шопена і др.

Др Мариюш Мончак то гушляр з лемківскыма коренями (його родиче походят з Береста, в котрым тіж одбуде ся єден концерт). Нич выіхал за океан студиювати в Ню Йорку і Монтреали, был учеником выдатного музыка і педаґоґа, Станіслава Гайзера. Як солиста і камералиста выступувал на найбільшых сценах світа. Днес, окрем концертуваня і нагрываня для знаных фоноґрафічных фірм, орґанізує концерты поважной музыкы в Польщы і Канаді.

Більше інформаций о фестівали найдете на заміщеных долов плякатах.