Президент гостил реліґійных представників та нацийональны і етнічны меншыны

14. січня/януара Президент Польской Республикы Анджей Дуда і Перша Дама Аґата Корнгаусер-Дуда приняли в Президентскым Палаци в Варшаві представників ріжных церкви і вызнаньовых звязкых та нацийональных і етнічных меншын.

Президент оцінил, што то барз символична стріча, і зазначыл, што участ в ній взяли представникы вшыткых найважнійшых реліґій і вызнань в Польщы. Дуда звернул вагу, што присутны сут вшыткы, якых предкы через столітя будували Польску Республику і влияли на єй подобу, тіж товды, коли Польщы на картах не было.

Президент припомнул, што два рокы тому Польща припоминала 450 років варшавской конфедерациі – закону, якій вводил загальну реліґійну свободу та рівніст громадян до права.

В новорічній стрічы участ взяли представникы римокатолицкого Костела, репрезентанты віроісповідань, што входят до Польской Екуменічной Рады, і другы. Серед них присутный был владыка Юрий, архієпископ вроцлавско-щеціньской єпархіі ПАПЦ, Православный Ординарий Польского Войска ци єпископ Аркадий Трохановскій, владыка ольштыньско-ґданьскій УГКЦ в Польщы.

Окрем Президента і інчых, зо своім словом выступил Григорий Куприянович, спілведучый Спільной Комісиі Уряду та Нацийональных і Етнічных Меншын, якій припомнул, што тогорічна стріча подля юлияньского календаря припала як раз на першый ден рока (1. січня/януара). «Про вшыткы нацийональны і етнічны меншыны в Польщы та соспільніст, што хоснує реґіональный язык, тот рік вяже ся з надзвычайно важным ювілейом 20-літя схваліня закону о нацийональных і етнічных меншынах та реґіональным языку» – бесідувал.

Того рода новорічна стріча президента з представниками ріжных конфесий і нацийональных і етнічных меншын є уж традицийом, но остатній раз орґанізувал єй як ґазда президентского палацу Анджей Дуда, якій в текучым році кінчыт свою другу каденцию.

фот. віцеміністер Внутрішніх Справ і Адміністрациі Томаш Шыманьскій | Facebook