Премєр Геґер оддав почливость блаженым єпіскопам

Председа влады Словацькой републікы Едуар Геґер быв у пятніцю 18-го юна 2021-го року на робочій навщіві Пряшова. Премєр одкрывав зреконштруовану Яркову уліцю, на котрій окрім іншого є і Велика сцена Театру Александра Духновіча.

В рамках свого робочого дня словацькый премєр в метрополі Шаріша быв приятый і в резіденції Ґрекокатолицького архієпіскопского уряду архієпіскопом метрополітом Йоаном Бабяком. Інформовав о тім Інформачный центер Пряшівской архієпархії.

Почас короткой навщівы собі председа влады в супроводі владыкы Йоана посмотрив просторы архієпіскопской резіденції.

„З увагов выслухав собі лекцію о історії ґрекокатоликів на Словакії і оддав почливость особностям той церькви – блаженому єпіскопови мученикови Павлови Петрови Ґойдічови, оціненому тітулом Яд Вашем – Справедливый меджі народами, і блаженому єпіскопови мученикови Васильови Гопкови,“ інформовав Михал Павлишіновіч, говорця Пряшівской архієпархії.

„Премєр Едуард Геґер пак зістав з архієпіскопом в щірім розговорі, почас котрого обговорили різны актуалны общественны темы. Владыка Йоан упевнив премєра о його молитвах за представителів державных властей і на кінцю му уділив своє архієрейске благословліня,“ закінчів інформацію Павлишіновіч.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА