Председом СКР і далшы два рокы буде Штефан Лявинець. Делеґаты схвалили великый ерб

В суботу 19-го авґуста 2023-го року продовжовав у Новім саді XVII. Світовый конґрес Русинів, котрый мав на проґрамі ІІ. і ІІІ. пленарне засіданя. На далшы два рокы буде на посаді председы Штефан Лявинець.

Робочій день почав тым, же председове окремых конґресовых комісії поінформовали о своїх засіданях, котры проходили день перед тым, а так само о робочіх планах на далшый дворічный меджіконґресовый період.

Делеґаты дістали і інформацію о пятніцьовім засіданю Світового форуму русиньской молодежи. Форум собі выбрав нову председкыню, котров стала Светлана Бойчук з Румунії. Авотматічно нова голова молодежного форуму стала і новов членков Світовой рады Русинів.

В кутрій оцінці засіданя форуму Светлана Бойчук выразила охоту актівно робити в рамках той платформы в слідуючім періоді.

Русины мають великый ерб

На XVII. Світовім конґресі Русинів схвалили делеґаты і великый, святочный ерб. Інформацію о можности схвалити собі великый ерб дістали делеґаты в рамках інформації о засіданю історічной комісії.

Гералдіка – флаґ і ерб, зістали єднакы як дотеперь, была лем офіціално схвалена можность хосновати великый ерб при святочных подіях, як і при репрезентації у вонкашніх односинах (комунікація з европскых інштітуаціями ітд.).

Пропозіцію великого ербу зробив Мілан Ян Піліп, делеґат конґресу за Словацьку републіку, котрый гералдіков, в тім чіслі русиньсков, занимать ся довгы рокы, і у 2014-ім році выдав триязычну публікацію з назвов Русиньска народна сімболіка. Пропозіція великого ербу была проїднана на засіданю історічной комісії, в першый день конґресу, а так само на засіданю Світовой рады Русинів в тот самый день.

Великый ерб быв схваленый почас ІІ. пленарного засіданя великов векшынов голосів. Великый ерб є твореный малым ербом і є доповненый о далшы мімощітовы знакы з природным мотівом, котры выражають Карпаты, їх фавну і флору. Носителями щіта суть традічны карпатьскы звірі медвідь і вовк, стоячі на буковім підставці, котрый зясь сімболізує карпатьскы буковы пралісы.

Під щітом ся вине пантлик з геслом, котре творять початочны слова русиньской гімны Я РУСИНЪ БЫЛЪ, ЕСМЬ, И БУДУ, похаджаючі з поезії Вручаніє од Александра Духновіча. Слова на пантлику суть написаны автентічнов ґраматіков так, як вышли в алманасі Поздравленіє русинов на год 1851 от літературного заведенія Пряшовскаго, котре упорядковав Александер Духновіч.

Председом зістав Лявинець

ІІ. пленарне засіданя продовжовало голосованьом о новім складі Світовой рады Русинів і о новій голові Світового конґресу Русинів.

На пропозіції делеґацій за окремы членьскы державы были до Світовой рады Русинів голосованьом делеґатів выбраты – Юрій Капац за Чеську републіку, Андрій Трохановскый за Польщу, Штефан Лявинець за Мадярьско, Мійо Шайтош за Хорватію, Ґеорґій Фірцак за Румунію, Михайло Фейса за Сербію, Мартін Караш за Словакію, Микола Бобинець за Україну, і Павел Роберт Маґочій за США і Канаду.

Маґочій быв до Світовой рады Русинів выбратый дочано, покля ся не вырішыть о новім членові Світовой рады. Причінов было, же делеґація зо Северной Америкы тот рік не мала жадно іншого представителя на СКР окрім Маґочія.

Як сьме спомянули высше, членом і і председкыня Світового форуму русиньской молодежи Светлана Бойчук. Новых членів так має молодежный форум, Чеська републіка і Сербія.

Світова рада Русинів номіновала на председу Світового конґресу Русинів Штефана Лявинця. Жадна інша номінація ани кандідатура не была оголошена. Делеґаты продовжыли мандат на далшы два рокы Штефанови Лявинцьови з тым, же за старонового председу голосовали вшыткы присутны делеґаты, нихто не быв проти, а нихто ся ани не стримав голосованя.

Секретарьом Світового конґресу Русинів зістав Володимір Противняк. Секретаря собі схвалила Світова рада Русинів. Підпредседа Світовой рады Русинів суть на далшый дворічный період Мартін Караш і Ґеорґій Фірцак. Прес-секретарьом зіставать Петро Медвідь.

Далшый конґрес буде в Бухаресті

Выбратя Ґеорґія Фірцака за єдного з підпреседів рады має і свою важну причіну. Світова рада Русинів схвалила, же XVIIІ. Світовый конґрес одбуде ся в столиці Румунії – в Бухаресті. Конґрес у 2025-ім році буде проходити в просторах румуньского парламенту.

Делеґаты XVII. Світового конґресу Русинів в рамках ІІІ. пленарного засіданя прияли і офіціалну резолуцію, котру будеме публіковати окремо.

Підписав ся меморандум

Головы членьскых орґанізацій на кінцю конґресовых засідань підписали Меморандум о довгодобій співпраці .

„Основным цільом Меморандума о довгодобій співпраці членьскых орґанізацій Світового конґресу Русинів є декларація співпраці на меджінародній уровни і потверджіня взаємной коордінації, при просаджованю сполочных цілів выходячіх із Станов обчаньского здружіня Світовый конґрес Русинів, одкликуючі ся на меджінародны документы як Рамковый договор Рады Европы на охрану народностных меншын, Европска харта меншыновых або реґіоналных языків, Копенгаґеньскы крітерії вступу до ЕУ, Меджінародный пакт о обчаньскых і політічных правах, Европскый договор о людьскых правах і далшы,“ пише ся в преамбулі меморандума.

Цільом меморандума є, жебы співпраца членьскых орґанізацій была іщі тісніша, і жебы конґрес, зареґістрованый на Словакії, мав потвердженый імідж і поставліня меджінародной орґанізації, што є про СКР важным при їднаню з европскыма інштітуціями і орґанізаціями.

Меморандум о довгодобій співпраці став підписаньом частьов Станов Світового конґресу Русинів.