Председа Світовой рады Русинів ку сітуації на Україні

Як ся пише у пресовій справі, котру підписав председа Світовой рады Русинів (СРР) Дюра Папуґа, на засіданях рады у 2014 р. веце раз бісідовало ся о сітуації на Україні, де жыє найвекша кількость карпатьскых Русинів.

Папуґа підекреслив, же СРР не підтримує жадны актівности різных орґанізацій і їх конґресів, котры прохидили в Мадярьску і Румунії, і на котрых было пожадоване одокреміня Підкарпатьской Руси од Україны і таксамо рада не підпорує самовыголошіня Републікы Підкарпатьска Русь, ці выголошіня той републікы з підпоров чуджіх армад. Подля Папуґы суть такы актівности пошырьованьом войны, што бы принесло „лем зло, жертвы і великы страты“. І кідь Папуґа пише у пресовій справі о пошырьованю войны, треба підкреслити, же сама Україна не бісідує о войні на своїй теріторії, але о Антітерорістічній операції. Папуґа єдночасно выразив жаль над тым, же до зоны АТО суть реґрутованы і Русины.

Председа СРР в пресовій справі знова пише о тім, же Русинам на Україні бы мало быти признане право голосити ся ку своїй народности, мали бы быти вызнаны як народностна меншына, што бы собі могли записати і в переписі жытелів, мали бы мати право хосновати свій язык і здобывати освіту у своїм материньскім языку.

Світовый конґрес Русинів, котрый бы мав прохидити в юні 2015 р. в місті Дева в Румунії, буде подля слов Папуґы знова вымагати од найвысшых державных орґанів Україны права про Русинів на Україні, жебы мали позіцію таку, яку єй мають Русины у вшыткых далшых державах Европы.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА