Пражскы Русины на привитаню Нового Рока

В суботу, 13. січня/януара 2018 р., русиньска меншына в Празі возме участ в концерті, якій пройде з нагоды привитаня Нового Рока за юлияньскым календарьом. Орґанізатором подіі є Академія Нацийональных Меншын. 

Перша тогорічна соспільна стріча нацийональных меншын в Празі пн. «Нова радіст стала» орґанізувана є не лем прото, жебы витати Новий Рік, але і за справом ювілею основаня Першой Чехословацкой Республикы (1918-1938 рр.), в склад котрой входила м.ін. Підкарпатска Русь. 

В рамках культурного проґраму, якій довєдна орґанізуют украіньска, болгарска та росийска меншыны, запрезентуют ся тіж Русины. Выступлят діти з Русиньского Центра в Празі та заспівают русиньскы парібкы з ґрупы Кантар, яка серед чешскых Русинів выникнула в 2015 р. ай діє при орґанізациі Rusini.cz. 

Подія зачне ся о 15.00 год. в Домі Нацийональных Меншын.