Православна церьков на Словакії одкрыла памятник ґеноціда

Святочна подія проходила в неділю 31-го януара 2016-го р. в Катедралнім соборі Успіня Пресвятой Богородіці і св. Йоана Милостивого михалівско-кошыцькой православной єпархії в Кошыцях. Коло храму одкрыв ся памятник арменьского ґеноціда. Подія проходила з нагоды минулорічной сторічніці спомянутого ґеноціда.

Святочна подія зачала о 9.30 год. Архієрейсков св. літурґійов, котру служыли Його блаженость Ростислав, архієпіскоп пряшівскый, метрополіта чеськых країн і Словакії і Його высокопреосвященость Ґеорґій, михалівско-кошыцькый архієпіскоп вєдно із священиками спомянутых єпархій. Участны были і представителі Арменьской апостольской церькви.

По закінчіню літурґії слідовало посвячіня памятника, котрый находить ся перед собором. Памятник є збудованый як тіпічный арменьскый камянный памятник з хрестом, котрый ся называть „хачкар“. Посвятив го єпіскоп Арменьской апостольской церькви Анушаван Жамкойчан, декан Теолоґічной факулты Єреваньской державной універзіты. Ціла подія была высылана і на другім каналі словацькой державной телевізії „Dvojka“.

Арменьскы жрідла пишуть, же масакры і депортації Арменів у Османьскій імперії в рр. 1915 – 1917 выжадали собі аж 1,5 міліона мертвых. Турція припущать лем 300 – 500 тісяч жертв, причім ся діштанцує од называня того історічного факту як ґеноціду. Арґументує, же тісячі Турків і Арменів вмерло коло етнічного ґвалту почас Першой світовой войны, коли Османьска імепрія войовала проти російской інвазії до выходных провінцій. Словакія вєдно з дакілько далшыма европскыма державами приняла выголошіня, котре признавать ґеноцід Арменів, што выкликало протесты Турції.

Памятник арменьского ґеноціду, котрый од неділі стоїть коло Православного собору Успіня Пресвятой Богородіці і св. Йоана Милостивого в Кошыцях, є першым такым памятником коло православной церькви на Словакії і другым на Словакії обще.

Фотоґрафія: Посвячіня памятника. (Жрідло: kosicednes.sk)

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА