Праві 2 млн зл на памятникы в Команчы

Ґміна Команча здобыла близко 2 млн золотых на три інвестициі – єдна вреализувана буде в самій Команчы, а дальшы в Туряньску і Куляшным. Зроблят м.ін. консервацию іконостасу.

В рамках Урядового Проґраму Одбудовы Памятників «Польскій Лад для Культуры» Ґміна Команча отримала 1 974 057,76 зл. Завдякы тому зроблят консервацию і ремонт даху, опорового муру і дотепліня Монастыря Згромаджыня Сестер Найсвятійшой Родины з Назарету, консервацию і ремонт памятниковой дзвінниці при дочырнім костелі покровы Матери Божой Неустанной Помочы та консервацию іконостасу в церкви св. Михала Архангела в Туряньску.

Некомплетный іконостас буде дополненый

Церков в Туряньску то обєкт, якій не лем же находит ся на Шляку Деревяной Архітектуры, а тіж Шляку Ікон Долина Сану і Ославы, але в 2013 році был вписаный на Список Світовой Спадковины ЮНЕСКО. Характеризує ся ориґінальном архітектонном формом. То получыня традицийных форм, што были популярны на обшыри східньой Лемковины, і змін, якы постепенно вводили од церковной архітектуры од кінця XVIII ст. (йосифизм). Подібный стиль репрезентуют іщы церков в Балутянці ци в Гыровій. Храмы тоты выріжняют ся осемпольовыма, конструкцийныма скліплінями, якы не выступуют на західній Лемковині.

Церков была вознесена в роках 1801-1803 для грекокатолицкой громады в Туряньску. По выселінях, од 1947 рока до 1961 рока храм хоснували римокатоликы. Тепер є то парохіяльна православна церков під тым самым, што ориґінальні, покровительством.

В літнім сезоні церков одвиджают туристы. В середині мож обзерати м.ін. поліхроміі авторства Йосифа Буковчыка з 1898 рока ци іконостас перемалюваный в 1895 році през того самого автора. Баданя іконостасу, м.ін. рентґенівскы знимкы, потверджают, што під малюнками Буковчыка сут добрі захованы образы з початку ХІХ ст.

Поліхроміі на стінах туряньской церкви мают выняткову вартіст – становлят унікальный примір влучыня елементів народной традициі до реліґійного малярства.

По роках ведіня забезпечаючых і консерваторско-ремонтовых робіт на зовни, тепер зачнут ся реновацийны працы в середині. Роботы над здекомплетуваным іконостасом коштувати будут коло 364,4 тис. зл, з чого дофінансуваня выносит 357 тис. зл, решту ґміна Команча доложыт зо свого буджету.

Термін закінчыня робіт вызначыли на 31. жолтня/октобра будучого рока. До того часу треба очыстити простір іконостасу, здемонтувати іконы і вшыткы рухомы части іконостасу, провести інвентаризацию. В пляні є очыстити іконостас, зробити дезинфекцию, локальні заімпреґнувати структуру, зміцнити конструкцию. Зроблят тіж золочыня і срібліня. Іконы очыстят з бруду і верніксу, здезинфекуют, буде зробленый ретуш. На конец образы забезпечат верніксом.