Пралісы Выгорляту

Находит ся на Словациі краіна, о якій путівникы не пишут за часто. Може то і добрі, бо в некотрых припадках ліпше оставити природу в спокою. І так кус рішено в темі Выгорлятскых Верхів, гірского пасма недалеко міста Гуменне в полудньово-східній Словациі. Выгорлят, бо і так тіж просто ся пише, знаный єст з того, же на його обшыри роснут єдны з найбільшых і найстаршых лісів. Не лем на Словациі, не лем в Карпатах, але аж і в Европі. Такой прогулькы не можеме не провести в нашых віртуальных вандрівках.

Выгорлят находит ся в Пряшівскым Краю, на обшыри окресів Гуменне, Снина, Михалівці і Собранці. Найвысшым пунктом реґіону єст гора з том самом назвом – Выгорлят (1076 м н.м.). Місцевы лісы і горы сут під охороном уж од 1973 рока, а од 2007 рока находят ся на Списку Світовой Спадковины ЮНЕСКО, што робит з них єден з найбарже храненых теренів на Словациі. Чом аж така опіка над том обшырю? Вшытко за справом місцевых буковых пралісів зо старшыма як 240 років деревами! З пункту пізріня природника положыня Выгорляту єст выняткове, бо його плянтра рослинности мают посередній характер медже західньокарпатском, східньокарпатском і панноньском флором. Аж 95% терену то лісы, а з них найбарже цінны сут великы, мало змінены чловеком буковы лісы, котры становлят більшіст храненой обшыри. В полудновій части Выгорляту, на низшых плянтрах можеме обзерати дубово-грабовы лісы, котры тіж сут барз інтересуючы.

Як заплянувати екскурсию в лісы Выгорляту?

Найскорше і найбарже выгідне для нас буде доіхати до єдного з міст, якы находят ся в околици пасма. Найбільше з них, Гуменне, явит ся як інтересуюча опция, не лем жебы оставити авто і піти на вандрівку в горы, але тіж можеме зробити малу прогульку центром. Хоц місто не оферує вельох атракций, то вартат перейти ся, глядаючы тзв. стріт-арту, якого не бракує на улицях Гуменного. А як іщы будеме мати кус силы, жебы посмотрити на чудовы видокы на місто, можеме выйти на гору Кальвария або в сторону верха Баранцова, де ведут тіж додатково туристичны шлякы.

Коли уж рішыме, же старчыт нам атмосферы словацкых міст, то одраз з Гуменного мож выйти на єден з парох туристичных шляків в напрямі села Ясенів, а пак або на Кривоштянку, або на Углиска і Холм. То можут быти нашы першы верхы, на якы выйдеме в Выгорлятскых Горах. Жебы выйти на сам верх Выгорляту, на жаль, треба нам вельо часу і силы в ногах, бо од Гуменного траса має 27 кілометрів, але можеме ю зменшыти о половину, як зачнеме вандрівку в селі Порубка.

В пралісах Выгорляту неє вельо шляків до вандруваня, а більшіст находит ся в східній части гір. Треба піти до міста Снина по пілнічній стороні або до села Реметскы Гамры на полудни. З тых місц скоро дойдеме до самого серця Выгорляту. А тым серцьом може ся для неєдного вказати місцеве озеро Морскє Око (не тото в Татрах і не Бескідскє Морскє Око в ґорлицкым повіті), до котрого більшіст туристів вандрує. Як любите іздити на роверах, то веде там тіж біциґльова траса.

Выгорлят то выняткове місце, о котрым не вшыткы любителі гір знают. Тепер коли лем глядаме тых недалекых місц, де не дошла іщы масова туристика, пралісы в східній Словациі являют ся ідеальныма. Скоро зачынат ся літо. Не вартат тратити часу і сідити в хыжы. Одсвіжме головы на лоні природы.

Джерела знимок:
фот. 1-3, 9-10 Wikimedia Commons
фот. 4-8 Якуб Зиґмунт
Мапа: www.mapy.cz