Потрібна поміч для грекокатолицкой церкви в Розділю

Грекокатолицка парохія в Розділю потрібує фінансового спертя на ратуваня місцевой муруваной церкви Рождества Пресвятой Богородиці. Потреба близко 300 тис. зл, котры допомогли бы вратувати церков м.ін. перед заваліньом.

Дотация? То не проста справа

Головний проблем, з котрым боре ся розділяньска парохія, то факт, што церков має муруваны стіны, а не деревяны. Кєд бы была она побудувана з дерева, проблем правдоподібно был бы скоро порішений. На деревяны храмы на обшыри Лемковины легко найти державны ай заграничны фонды. На жаль, ревіталізацийны ґранты не все обнимают сакральны будівлі, якы подубуваны з каменя. Всякы консерваторскы роботы в першій черзі сут выконуваны на деревяных церквах в карпатскым реґіоні. Муруваны сут покус лишены самы собі.

Небезпеком для церкви в Розділю є поблизкій потік, якій фурт підберат землю. Внет може забрати кавалец землі, з котрым споєний є храм. Церков стоіт лем на насыпаній земли, а не фундаментах. До того доходит планний стан муруваных перед двома столітями камінных стін.

Цілю ратуваня церкви перед зваліньом, в 70. роках ХХ ст. церковны стіны были споєны двома желізныма прутами – так, што бы муры скрутити ґу собі. Стало ся так, понеже ґу старшій части храму добудувано молодшу, котра з часом зачала одходити од мурів первістной святыні.

Ратунок 

Ратунком для муруванoй церкви є выляня фундаментів, котры зміцнили бы єй консктрукцию. Як вычысл парох о. Григорий Назар вєдно зо своіма парохіянами, на тоту ціль треба близко 320 тис. зл. Церков без комплексовой ревіталізациі може досправды ся звалити. До того доходит час, з котрым будут ся бороти розділяне, смотрячы як близко буде підходила вода з реченого поблизкого ярку.

Парохія писала внескы о дофінансуваня, но на жаль все бракує пару пунктів до отриманя ревіталізацийного ґранту. Причына? Храм є муруваний, а то одраз обнижат його забыткову цінніст, прото в першій черзі переходят внескы на інчы деревяны церкви, костелы. Тепер тырват борба о два дальшы внескы. Быти може, котрисий перейде. Парохіяне приобіцяли, што зо своіх кышени дадут грошы на ремонт іх церкви.

Храм двох обрядів 

Святыня в Розділю полнит функцию і грекокатолицкой церкви, і римокатолицкого костела. Была побудувана в 1786 році. По повороті части Лемків з выгнаня і наново правліню грекокатолицкых богослужынь (1984 р.), церков была вернена грекокатоликам. Римокатоликів обслугує парох з сусідніх Липинок. Традицийом бодай од столітя є путуваня грекокатоликів 15. серпня/авґуста на римокатолицкій одпуст до Липинок. Римокатоликы сперают грекокатоликів в іх старанях о фонды на ратуваня святыні.

Каждий, хто хоче спомочы грекокатолицку парохію Рождества Пресвятой Богородиці в Розділю, має можніст переслати даток на банковий рахунок:

Parafia Greckokatolicka NNMP w Rozdzielu, 38-304 Kryg,

Bank Spółdzielczy w Lipinkach

nr 56 8628 0000 2001 0009 6188 0001