Посвятили воєньскый цінтерь у селі Збійне

В селі Збійне, в окресі Меджілабірці, в пятніцю 20-го октобра 2017-го року посвятили войновый цінтерь із І. світовой войны. Інформовав о тім Клуб воєньской історії Бескиды на своїй сторінці на сіті Facebook.

Посвячіня цінтеря было завершіньом обновы, котру реалізовали добровольници Клубу воєньской історії Бескиды за помочі приятелів із Чеськой републікы, Польщі і Мадярьска. „І тов путьов, дякуєме вшыткым, котры запоїли ся до обновы. Вдяка їх роботі має веце як 100 павшых вояків конечно достойне місце остатнього одпочінку,“ написали членове клубу на своїй сторінці.

Не знали го локалізовати 

Воєньскый цінтерь, котрый находить ся приблизно кілометер од села Збійне, довгы рокы заростав.

„Довгы рокы сьме го не знали індентіфіковати. Ани містны люди нам не знали повісти точне місце, де бы ся мав находити,“ повів про словацькый денник Korzár председа клубу Мартін Дробняк. Добровольници ся до обновліня пустили у 2014-ім році. Місце, де є цінтерь, ся наконець подарило локалізовати вдяка архівным матеріалам, на основі котрых любителі воєньской історії захопили єдну лінію гробів.

В першій фазі ся чістив простор, пак будовали оплочіня, зробили ся кресты на гробах, дала ся зробити памятна табла і наконець выбудовав ся централный памятник. Обнова собі подля Дробняка выжадала стовкы добровольниками одробленых годин. Почас обновы ся подарило членам КВІ Бескиды дослідити, же цінтерь быв напроєктованый мадярьскым архітектом Йожефом Лампінґом, котрый проєктовав дакілько десяток цінтерів на выходній Словакії. Нарис цінтеря є теперь і на іфнормачнім панелі цінтеря і членове клубу го здобыли із родинной дідовизны архітекта.

Інтереснотьов обвновленого цінтеря є централный крест. На основі властной пропозіцї го зробив умелецькый коваль із Мадярьска, котрый є любительом воєньской історії і співпрацує із Клубом воєньской історії Бескиды. Крест є зробленый із колячого дроту і з протипіхотных барьєр. Суть то вірны реплікы із Першой світовой войны.

Вояци трьох армій 

Міджі селами Валентівці, Вырава і Збійне почас І. світовой войны проходили тяжкы бої. На цінтері, котрый теперь обновили, є похороненых понад 100 вояків із трьох армій. Австо-угорьской, німецькой і російской. Нажаль, гробовы місця російскых вояків ся не всокотили.

Як повів Мартін Дробняк, тоты місця бы хотіли добудовати. І кідь ся точно не знать, в котрім гробі вояци лежать, здобывають поступно мена павшых вояків, котры вмерли в околіці села. Подля Дробняка собі і они заслужать мати свій памятник.

Облновелый цінтерь із І. світовой войны в селі Збійне быв в пятніцю посвяченый містныма воєньскыма духовныма.

Жрідло фотоґрафії: Facebook.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА