Посвятили обновлены войновы цінтері в Репейові і Янківцях

Обновлены цінтері із Першой світовой войны в селі Репеїв в окресі Меджілабірці і селі Янкiвцi, Гуменьского окресу, у віторок 13-го авґуста 2024-го року святочно посвятили.

Цінтері перешли обновов од 2023-го року, на обидвох были збудованы новы памятникы, на котрых суть і мена похованых вояків. Як повів про аґентуру TASR председа Клубу воєньской історії Бескіды Мартін Дробняк, посвячіня приправили у співпраці із селами Янківці, Репеїв і Нижня Полянка, Бардейовского окресу.

В рамках обновы робили і баданя

„Посвячіньом цінтерів мы днесь оддали почливость ту похованым воякам, котры в области загынули при тяжкых боях почас Першой світовой войны, котра почала перед 110-ма роками,“ повів Дробняк.

Іде о малы войновы цінтері, котры суть частями цівілных сельскых цінтерів. Спискы вояків обробили історіци із Клубу воєньской історії Бескіды. Баданя імен было частьов проєкту обновы тых пєтных місць.

„На памятниках робили ремеселници і добровольници влони на умелецько-ремеселнім пленері, котрый быв частьов черезгранічного словацько-польского проєкту в рамках проґраму Interreg,“ повів староста Нижньой Полянкы Ян Цундра.

На войновім цінтері в селі Репеїв є похованых 46 вояків австро-угорьской армії в масовій шахті. Вояци вмерли у фебруарі і марці 1915-го року. Гроб локалізовали у 2022-ім році і выбудовали централный памятник із списком похованых.

„Посвячіня войновых цінтерів было реалізоване в тісній співпраці із Озброєныма силами Словацькой републікы,“ додав председа КВГ Бескіды Дробняк.

Клуб працує далше

Як інформовав Клуб воєньской історії Бескіды на своїх соціалных сітях, добровольници працовали далше і почас посліднього вікенду. Тот раз в селі Вырава, Меджілабірьского окресу, де находять ся три войновы цінтері, на якых похованых є понад 3 500 вояків, котры впали в роках 1914 і 1915.

Тоты місця похованя находять ся на бывшім бойовім полю, часто лем дакілько метрів од окоповых ліній.

Клуб із Выравов співпрацує вже од 2008-го року. „Реґуларно помагаме із стараньом ся о войновы цінтері, котры суть над селом. Занимаме ся утримованьом пішника, бо о вшытко треба по роках одповідно старати ся. В тім році проходить обнова пєтных місць у векшім розсягу,“ інформовав клуб.

Фото: TASR.