Посвячыня церкви в Білянці

(Білянка – православна церков Покровы Пресвятой Богородиці і Почаівской Іконы Божой Матери, фото: Миколай Ґрич)

В Білянці 7. вересня 2014 р. буде проходило посвячыня православной церкви Покровы Пресвятой Богородиці і Почаівской Іконы Божой Матери. Святкуваня зачнут ся уж ден перше – о 17.00 – Всеночном. Св. Божеску Літургію в ден посвячыня буде вюл митрополита Сава враз з запрошеныма владыками з Польщы і заграниці.

Проєкт білянчаньской церкви подаруваний был Сербском Православном Церквю, а будова зачала ся 20. мая  2012 р. в наслідстві реґуляций, якы тыкали ся права власности деякых храмів (в тым і старой церкви в Білянці, яка перешла під власніст грекокатолицкой парафіі) в полудньовій Польщы. До 2012 р. вірны православной, грекокатолицкой і римокатолицкой парафій молили ся в єдным храмі Покровы Пресвятой Богородиці.

Нова православна святыня буде мала два покровительства: Покров Святой Богородиці і другє – Почаівску Ікону Божой Матери, являюче ся престольным праздником, котрий єст для білянчаньскых вірных барз важний з той причыны, же, як інформує нас парох о. Андрий Ґрич, “нашы люде в давных часах ходили з поломничеством до Почайова, а в Білянці барз красні співают ріжны пісні до Почаівской Матери Божой, што єст того свідоцтвом.”

Білянка то перше в Польщы село, в якым в 2009 р. за внеском Лемківской Молодіжной Орґанізациі “Чуга”, трибом передвидженым в “Уставі о народовых і етнічных меншынах та реґіональным языку”, поставлено двоязычны польско-лемківскы таблиці місцевости, хоц при великым сопротивліню місцевого польского населіня. Од 2009 р. были уж знищены незнаныма вандалями (?) і поставлены зас.