Посвячыня одреставруваной дзвінниці в Королику Волошскым

В суботу 22. серпня т.р., о 17.00 год., в лемківскым селі Королик Волошскій, одбуде ся посвячыня одреставруваной прицерковной дзвінниці.

Як заявляли сме за тым мотузком, на реставрацию дзвіниці ініцияторы потрібували ок. 14 тис. зл. Як видно, нашли ся офіродавці, котры спомогли сесу збірку. Орґанізаторы мают в плянах одреставрувати в будучым цілий сакральний комплекс т.є. окрем дзвінниці – тіж церков.

Скорше плянувано, же посвячыня дзвіниці одбуде ся 15. серпня, але рішено, же одбуде ся о тыжден пізнійше, в 70. річницю переселіня бывшых жытелів Королика Волошского на совітску Украіну.

Стоваришыня Королик Волошскій, котре заініциювало акцию, было покликане в 2009 році. Уж днес може ся оно похвалити хоц бы тым, же вдало ся його членам позыскати право власности до церковного комплексу та дорогу до церкви і цмонтеря. Окрем того, систематычні порядкуют терен окружаючий церков. Повело ся тіж забезпечыти храм перед грабителями, монтуючы новы двері і затыкаючы вікна.

Мрийом Стоваришыня Королик Волошскій єст основаня в одреставруваным церковным комплексі музею сакральной штукы Лемковины. Місце тото мало бы остати символом не годжыня ся на нищыня слідів минулого.

Не будме, предовшыктым мы – Лемкы, обонятны на такы ініциятывы.

А за тым мотузком можете одвидіти ґамбокнижковий фанпейдж цілого проєкту, на котрым найдете вельо знимок, декоментуючых поступы в роботах.