Поступуют роботы при С19 (S19)

Інтенсивны роботы проходят при будові експресовой дорогы С19 (S19) на обшыри підкарпатского воєвідства. Ведены сут паралельні на парох одтинках. В остатнім часі зосереджают ся на фраґментах: Ряшів Полудне-Бабиця, Місце Пястове-Дукля та Дукля-Барвінок.

Медже Місцьом Пястовым а Дукльом 10-кілометровый одтинок побудує фірма Страбаґ – Ґенеральна Дирекция Державных Доріг і Автострад (ҐДДДіА) як раз підписала контракт на проєкт і роботу. Побудуют дорогу з розділеныма напрямами руху (по два пасы) та дороговый узел в Дукли. Там експресова дорога С19 получыт ся з державном дорогом но 19. В будучности до узла має быти влучена і воєвідска дорога но 993 Ґорлиці-Новый Змигород-Дукля.

Тяжкы условія терену

Окрем самой дорогы в рамках робіт вознесут 47 інжынєрскых обєктів, в тым 17 мостів і естакад. Побудуют тіж два Місця Обслугы Подорожуючых І катеґориі в місцевости Рівне та переходы для звірят.

Одтинок експресовой дорогы С19 Місце Пястове-Дукля переходит через обшыр о скомпликуваній ґеолоґічній будові, часто выступуют осуваня землі або сут місця, де може доходити до єй обсуваня. Окрем того одтинок переходит тіж через копальняну обшыр Бубрка-Рівне І, де експлоатували нафтову ропу.

Початок робіт плянют на будучый рік, а закінчыня – на половину 2025 рока.

Дукля-Барвінок

Успішні закінчыл ся тіж конкурс на запроєктуваня і будову веце як 18-кілометрового одтинка експресовой дорогы медже Дукльом а Барвінком, што граничыт зо Словацийом. То єден з тяжых одтинків Via Carpathia в Польщы з огляду на ґеолоґічну будову і середовисковы условія.

Спосеред осмох оферт найліпшом вказала ся тота од спілкы POLAQUA, яка зреализує реченый одтинок за кус веце як 1,5 млд зл.

Роботы обнимают будову дорогы, але і дорогового узла Барвінок в місци получыня С19 з істнуючом ДК19. Вознесут тіж інжынєрскы обєкты, в тым м.ін. 15 естакад (найдолша буде мала 1,1 км і буде поміщена над долином на стопах долгости коло 35 м од рівня терену), 16 інчых мостів і 6 переходів для звірят.

Ґенеральна Дирекция Державных Доріг і Автострад плянує, што роботы скінчат максимальні до 42 місяців од даты підписаня догваріня.

С19

Експресова дорога С19 то елемент медженародного шляку Via Carpathia, што лучыт пілнічну Европу з полудньовом. В Польщы траса чыслит 700 км долгости і веде через підляшскє, мазовєцкє, люблиньскє та підкарпатскє воєвідства.

Фот. twitter.com