Постанова о скликаню Конґресу Стоваришыня Лемків

Постановом но. 1/2015 Головного Заряду Стоваришыня Лемків, на основі §59 пкт. 1, остал скликаний на ден 25. квітня 2015 рока VII Звычайний Конґрес Стоваришыня Лемків.

Кінцьом марця явит ся детальний проґрам  VII Звычайного Конґресу СЛ, котрий буде проходил в Ліґници. Делеґатами на Конґрес Стоваришыня Лемків будут выбраны члены кружків орґанізациі, котры на засіданю 25. квітня будут выберати новы власти Стоваришыня на наступну 4-річну каденцию.

Стоваришыня Лемків єст першом по політычных перемінах перелому 80./90. років ХХ ст. лемківском орґанізацийом, непрестанно діючом од 1989 р., котра в своіх статутовых цілях мат записану м.ін. інтеґрацию Лемків, розвиток лемківской культуры, вчыня лемківского языка, популяризацию істориі Лемковины. Од самого початку (1991 р.) СЛ єст членом Світового Конґресу Русинів. Дотеперішній ведучий СЛ, Андрий Копча, шефувал Конґресови в роках 2003-2005.