Посліднє засіданя Спільной Комісиі Уряду та Нацийональных і Етнічных Меншын

На ден 21. грудня/децембра 2016 р. заплянуване єст посліднє тогорічне LVIII засіданя Спільной Комісиі Уряду та Нацийональных і Етнічных Меншын, котре зачне ся од 9.00 год. в будинках Міністерства Внутрішніх Справ і Адміністрациі в Варшаві.

Як чытаме в гармоноґрамі прац на 2016 рік, поміщеным на сайтах міністерства, на тым засіданю являт ся понижшы темы:

• Діяльніст державных орґанів (Аґенция Внутрішньой Безпекы – Agencja Bezpieczeństwa Wewnętrznego) в обшыри забезпечыня польскых радикальных ґруп та середовиск нацийональных і етнічных меншын перед інфільтрацийом заграничных служб.
• Інформация Міністерства Внутрішніх Справ і Адміністрациі о дотациях, признаных на 2017 рік, на задачы, цілю котрых єст охорона, підтриманя і розвиток культуровой достоменнтости нацийональных і етнічных меншын, та підтриманя і розвиток реґіонального языка.
• Інформация о детальных принципах процедуры признаваня дотаций на 2018 р., маючых як ціль охорону, підтриманя і розвиток культуровой достоменнтости нацийональных і етнічных меншын, та підтриманя і розвиток реґіонального языка.
• Грамоноґрам прац Спільной Комісиі на 2017 р.

Окрем того, ден наперед, 20. грудня/децембра 2016 р. о 18.00 год. буде засідала меншынова сторона СКУтНіЕМ, зложена з представників поєдных меншын. На тым засіданю репрезентанты меншын м.ін. стрітят ся з експертами, котры берут участ в працах ґрантовой комісиі, омовлят проєкты змін декотрых законів (устава декомунізацийна, реформа систему едукациі, устава о Інституті Нацийональной Памяти) і приймут своі опініі і становиска до проблемів, котры представлят на LVIII засіданю Спільной Комісиі Уряду та Нацийональных і Етнічных Меншын. Ци найде ся посеред них справа перманентного нищыня польско-лемківскых названь місцевости на Лемковині (в Ґладышові і пак в Реґєтові), як обіцяли на стрічы в Ліґници репрезентанты лемківской меншыны, проф. Штефан Дудра і др Мирослава Копыстяньска? Того іщы не знаме, але такій пункт не был вычыслений в пляні засіданя меншыновой стороны Спільной Комісиі.