Поляк потрафит – значыт Оркєстра св. Миколая нагрыват нову платню

Ансамбль Оркєстра св. Миколая з Люблина то ґрупа, яка розславила лемківску народну співанку серед польской соспільности, коли нихто того іщы не робил в так модерний спосіб. А зачынали уж понад 25 років тому! Вельо аранжаций пісен авторства ансамблю вошло в свого рода сучасний канон лемківской співанкы і нихто не выображат уж собі інакше заграной, або заспіваной напр. співанкы Заграйте мі гушлі. Миколаі стали ся джерелом інспіраций для неєдного фолькового ансамблю.

През рокы граня і творіня музыка Миколаів еволюувала, але все одкликувала ся до польской народной творчисти і меншын жыючых на обшыри Польщы. Найновший проєкт, материял рыхтуваний уж два остатні рокы, Моды і коды, то вказаня звязків корінной музыкы з сучасныма жанрами музыкы, якы ся з ней выводят. Моды і коды то суть і підсумуваня місиі ансамблю, котрий все глядал новых сучасных контекстів фасцинациі традицийном культруом. Моды і коды то фузия world music з гіп-гопом, блюсом і роком.

Два дни тому рушыла акция збераня фондів на Моды і коды. Цілий музычний материял на платню уж єст, част грошів тіж – бракує 11.000 зл. Ансамбль мож сперти довільном квотом серед запропонуваных, а в подякуваню каждому штоси ся достане 🙂 Зазерайте і вплачайте на сайті polakpotrafi.pl за тым мотузком. Най Лемко тіж вкаже, же знат помочы!

фот. пресовы материалы (фот. Анджей Поляковскі)