«Польско-рускій Бескід. Леґенды і оповіданя»

На выдавничым рынку явила ся нова книжка авторства Анджея Потоцкого пн. «Польско-рускій Бескід. Леґенды і оповіданя». Як вказує сам наголовок, є то 178 леґенд і оповідань, котры были зобраны автором вчас чысленных прогульок по Низкым Бескіді. В своіх опрацуванях Анджей Потоцкій односит ся до необычной істориі реґіону, якій през вікы был вітчызном Поляків, Лемків, Погірян, Долинян, Замішанців, а тіж Циґанів. Што інтересуюче, 5 леґенд переведено на лемківскій язык (тлумачыня зрыхтували Моніка Тылявска – редакторка радия ЛЕМ.фм, і Варавара Дуць – учытелька лемківского языка). Автор рішыл помістити іх в публикациі прото, же тоты горы то рідна земля Лемків. В оповіданях і леґендах находиме барвний, вельокультуровий Бескід з цілом його природничом красом. Познаєме місточка, села і селечка, як тіж жытя і традициі його мешканців.

Анджей Потоцкій – вродил ся в Рыманові в 1947 році. По професиі є аніматором культуры і істориком – абсольвентом Высшой Педаґоґічной Школы в Ряшові і Ягайлоньского Університету в Кракові. Од 1989 рока занимат ся професийом журналісты репортажысты. Публикує в реґіональній і загальнопольскій пресі та реалізує фільмовы материялы для Польской Телевізиі, в котрій од парунадцетьох років робит публицистом. В роках 1991-1993 был головным редактором громадяньского денника «А-З». Дебютувал в 1973 році в «Літерацкым Жытю». На своім конті має двадцет вісем наголовків книжок і збірок поезиі. Нашым слухачам знаний є головні з книжкы «Леґенды лемківского Бескіду».