Половина вересня – «Говорить Пряшів» – пятниця, 20.00 год.

Іде нове, а такой уж пришло. Деси меньше-більше од тыжня і мы, а предовшыткым Вы, дорогы чытателі, мате нагоду спознавати наш новий сайт. Інчы кольоры, інчий уклад, але основне ся не помінило – є фурт по свому, фурт по русиньскы! 

Витати нове все радо ся принимат. Каждий любит доставати новы дарункы, або новы ґаджеты, о кілько го тото тішыт. Нове ЛЕМ.фм то не лем радийо, якє уж долший час слухате ци то на рідній Лемковині зо столпа в Ґорлицях, ци на чужыні – в Польковицях, але як раз нова подоба нашого порталю. Лем же новіст мож видіти і в другых вымірах. В нас тото хоц бы проявляти ся може тым, же каждий ден новий проґрам про Вас наша редакция рыхтує. Од долшого часу так і є з поучытельным проґрамом «Говорить Пряшів», якого премєровы одтинкы фурт можете выслухувати в пятниці по 20.00 год. за нашым фльориньскым часом. 

Так і днес щыро Вас просиме выслухати дашто про байку Михайла Гіряка, «Як хлоп ґаздинил», в нашій радийовій бібліотеці. Іщы може загаіме о русиньскых целебритів. Буде про Михала Сотака – языкознавцю, русицисту і академіцкого професора Університету в Нітрі. 

Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.