Poloniny trail ставать реалностьов. Ціклоокруг іде через русиньскы села

Як інформовала Даша Єленьова, говоркыня Пряшівского самосправного краю (ПСК), крайска самосправа в понедільок 20-го марца 2023-го року в рамках проєкту біціґльового округу Poloniny trail спустила будованя новых і реконштрукцію існуючіх біціґльовых стежок в части Стащін і Старина – Руське, котры суть в довжці 23 км.

На реалізацію ся схоснують европскы грошы, державны, але і властны джерела в цілковій сумі 11,2 міліона евр.

Полонины обыжывають

Атрактівный проєкт ПСК Poloniny trail, котрый капчать русиньскы села ціклоокругом, має помочі підняти потенціал Полонин, а так само помочі ку розвитку турізму в тій части краю.

Актуално вдяка ініціатіві Catching up-Regions (CuRI) і підпорі Міністерства інвестіцій, реґіоналного розвитку і інформатізації Словацькой републікы (МІРРІ) зачінають реалізовати його найвекшы цікловыступы, котры надвязують на пілотный проєкт Карпатьска мобіліта.

Ціклотраса зачінать частьов Снина – Стащін, в рамках котрой выбудує ся першых 8 км, і продовжує далше реконштрукційов вже існуючой комуникації Старина по бывше, уж не існуюче русиньске село Руське, в цілковій довжці понад 14 км.

Проінвестує ся притім понад 11,2 міліона евр, з того майже 7,6 міліона є з Інтеґрованого операчного реґіоналного проґраму, а 1,6 міліона евр з МІРРІ. Крайска самосправа інвестує понад 2 міліоны евр з властных джерел.

„Полонины обжывають, і я мам з того щіру радость. По роках приправ і гляданю фінанцій спущаме реалізацію двох великых біціґльовых актівностей в розсягу майже 23 км, котры обсягують цілый ціклістічный мобіліар, як суть лавкы, мосты, алтанкы. Людям, котры ту жыють, принесуть ліпше перепоїня єдной части парку і приведуть гев далшых турістів, котры пак будуть мочі видіти тутешні буковы пралісы, деревяны церьковці, але і спознати полониньскы традіції, звыкы ці кухню,“ приближыв заміры в Полонинах пряшівскый жупан Мілан Маєрьскый.

Як повів, біціґльовы стежкы суть на тій теріторії лем зачатком обжывльованя той области, про розвиток турізму є ту потрібна далша і інфраштрутура.

„В рамках ініціатівы CuRI суть посередництвом резорту господарьства підпорены тутешні малы і середні подникателі, котрых проєктовы заміры за 4,5 міліона евр принесуть модернізацію містных заряджінь про уквартельованя, і іновації служеб в турістічнім русі. Резултатом буде комплетный паклик, котрый поможе Народному парку Полонины дістати ся до фокусу турістів з Европы, докінця з цілого світа,“ додав Маєрьскый.

Іде і о робочі місця а економіку

Проєкт в Полонинах рахує окрім ціклотрас і з далшыма актівностями, котры поможуть розвитку турістічного руху і підкресліню тамтешньой културной дідовизны. Єднов з них є і підпора творіня новых робочіх місць в тій области.

„Про економіку країны є важным, жебы розвивав ся каждый реґіон, а жаден не зістав боком, і зато сьме ту. Жебы сьме помагали тым менше розвитым реґіонам добігнути розвитішы, а еліміновати розділы. Тырвало то довгу добу, покля сьме ся в Полонинах до той фазы дістали, причім уж передтым о тото намагали ся і іншы, но не были успішны. Но не є то лем початок новых проєктів, але і закінчіня барз великого множества роботы, котре опередило реалізацію,“ повіла при передавню ставбы Еллен Гамілтон із Світовой банкы, яка вєдно з Европсков комісійов ініціатівов Catching up-Regions проєкт застрішує.

Што вшытко ся зробить?

В рамках першой етапы реконштрукції біціґльовых стежок в части Старина – бывше село Руське перейде обновов 14,3 км містной драгы. В рамках того зробить ся і реконштруцкія семох мостів. Оправлять ся і далшы части драгы як каналы, вычістять ся яркы ітд. Вытраты представлюють 6,8 міліона евр.

В напрямі Стащін выбудує ся вісем кілометрів новых ціклотрас. Мобіліар буде творити біціґльова лавочка і три новы ціклолавкы. На приблизно пятім кілометрі збудує ся підход, прибудуть муры ці кленбы. Рахує ся і з выбудованьом оддыховых зон. Проінвестує ся ту 4,4 міліона евр.

Обидва біціґльовы проєкты будуть реалізовати ся приблизно єден рік. Закінчіня робот очекує ся в апрілю 2024-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА