Poloniny Trail наберать реалны контуры, зачінають будовати першы части

Проєкт Пряшівского самосправного краю (ПСК) Poloniny Trail наберать реалны контруы. Край зачінать з будованьом першых двох частей біціґльового округу, од Стащіна коло водного резервоару Старина аж по бывше село Руське.

Як інформовала говоркыня ПСК Даша Єленьова, край здобыв фінанції з Інтеґрованого реґіоналного операчного проґраму (IROP), а вложыть до реалізації і властны грошы. Контракт з фірмов, котра буде ціклостежку будовати, підписали в понедільок 17-го октобра 2022-го року.

Першы дві ціклотрасы

В рамках проєкту Poloniny Trail ПСК зачне реалізовати выбудованя двох ціклотрас з довжков 23 кілометрів. Має схвалены фінаннції в сумі майже пять міліонів евр на добудованя ціклоінфраштруктуры в части Старина – бывше село Руське, і далшых 3,5 міліона про часть Стащін.

На проєкті в цілковій сумі 8,5 міліона евр Пряшівскый самосправный край бере участь пятьпроцентным співфінанцованьом.

Карпатьска мобіліта

Розвитку турістічного руху в реґіоні Снина і в локаліті Народного парку Полонины поможуть подля Єленьовой і далшы актівности.

Єднов з них є проєкт Карпатьска мобіліта в рамках проґраму ENI CBC HUSKROUA з розрахонкум 1,15 міліона евр, де партнерами суть села Стащін і Уліч, Лісогосподарьскый маєток Уліч, а на україньскім боці село Великый Березный і Меджіреґіоналный центер черезгранічной співпраці з Перечина.

„Карпатьска мобіліта є яковсь першов фазов проєкту і приносить першы реалны крокы. Тым є модернізація драгы Руське – Берестова Полянка на біціґльову стежку з довжков 4,6 кілометра, котра спаять Poloniny Trail і історічну трасу Porta Rusica в словацько-польскім пригранічу. Поздовж ціклотрасы в Улічу і Стащіні так само выбудують ся елементы дрібной інфраштруктуры, а приготовлює ся і технічна штудія про ходник Полонины з напоїньом на гранічный переход Убля,“ повів ведучій Одділіня проєктового ряджіня Уряду ПСК Ян Коцак.

З імплементаційов Карпатьской мобіліты ПСК зачав уж в місяці юн 2021-го року, моментално є в першій половині реалізації. Як часть проєкту Poloniny Trail, котрый бы мав представльовати 87 кілометрів довгый біціґльовоый округ в Народнім парку Полонины, має забезпечіти якостну ціклоінфраштруктуру про розвиток турізму.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА